VOV4.Êđê- Knŏng hlăm wang êbeh 4 mmông, yap mơ̆ng 2 mmông 8 mnĭt tlam truh kơ 6 mmông 4 mbĭt tlam hruê 23/8, ti alŭ wăl kdriêk Kon Plông, čar Kon Tum mâo 7 blư̆ klei mgei lăn. Dŭm klei mgei lăn hŏng hnơ̆ng kpal, djŏ hlăm wưng ngă bruă bi kdơ̆ng êa ti ênao êa knơ̆ng bi êran pui klăm akŏ Kon Tum dôk mâo lu phung kreh knhâo yap jing sa hlăm dŭm mta phŭn ngă truh dŭm klei mgei lăn ti alŭ wăl kdriêk Kon Plông, čar Kon Tum. Klei hưn mơ̆ng bruă sang čư êa kdriêk Kon Plong brei ƀuh, ka mâo ôh klei hmăi kjham mơ̆ng klei mgei lăn ngă truh.

Hlăm klei kƀĭn hlăng mơ̆ng bruă sang čư êa dŭm kdriêk, knŏng mâo mă sa gŏ sang ti alŭ Đăk Čơ, să Đăk Ring mâo klei hmăi kyua klei mgei lăn. Klă klơ̆ng jing tôl săng nah tluôn jhat rai mơ̆ng êlâo leh anăn lĕ đuê̆. Bruă sang čư êa să Đăk Ring tiŏ nao leh mnuih ngă bruă ksiêm dlăng, đru kơ mnuih ƀuôn sang mgaih msir. Êngao kơnăn, bruă sang čư êa ka čih yap ôh dŭm klei hmăi kơ mnuih leh anăn ngăn dŏ kyua dŭm klei mgei lăn ngă truh.

Pô mblang: Y-Ƀel Êban