Hlăm klei bi kƀĭn, lu klei blŭ lač, ênoh prăk mơ̆ng  Hdră bruă hdră kñăm ala čar kơ klei mđĭ kyar bruă duh mkra - ala ƀuôn krĭng mnuih djuê ƀiă leh anăn krĭng čư̆ chiăng wưng thŭn 2021-2025 ka mâo gưl dlông hưn mdah anăn lu čar tuôm hŏng klei dleh dlan hlăm bruă mkŏ mjing hdră kčah yua prăk bi liê,

 Dŭm knơ̆ng, dhar bruă jao bruă gĭt gai dŭm hdră bruă, ƀiădah ka dưi hlue ngă ôh bruă klam hdră kčah, ktrâo lač hlue ngă leh anăn ksiem wĭt boh tŭ hlue ngă hdră bruă… Knơ̆ng bruă sang čư̆ êa dŭm kdriêk hlue ngă Hdră anei adôk mtŭl mtŭl hlăm klei ksiêm hriăm, ba yua pŏk ngă dŭm hră mơar ktrâo lač mơ̆ng gưl dlông leh anăn čar, ka mâo hdră msir čiăng mlih mrâo hdră ngă.

 Hlăm thŭn 2022, lu dŭm kdriêk ka dăp prăk ba yua mơ̆ng prăk knŭk kna mơ̆ng kdriêk čiăng ngă Hdră anei. Trần Văn Mẫn,  Khua Knơ̆ng bruă djuê ana čar Quảng Ngãi lač, Hdră bruă 9 mơ̆ng  Hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng kơ “duh bi liê mđĭ kyar êpul mnuih djuê ƀiă  mnuih snăk leh anăn êpul adôk lu klei dleh dlan” ka dưi ktrâo lač klă klơ̆ng kơ hdră brei čan , hnơ̆ng dưi čan, wưng čan leh anăn prăk mnga čan hŏng bruă đru kơ dŭm gŏ êsei mnuih djuê ƀiă dôk tuôm hŏng lu klei dleh dlan. Ară anei, čar Quảng  Ngãi mâo lu prăk bi liê ƀiădah amâo dưi hlue ngă.

“Hmei srăng akâo, hdră brei čan anei dưi hlue ngă hlue si hdră jao kơ Knơ̆ng prăk đru ba ala ƀuôn brei čan. Msĕ si bruă sang čư̆ êa dŭm alŭ wăl ară anei dôk ngă, mbha prăk brei čan, jao kơ Knơ̆ng prăk ala ƀuôn brei čan. Phung dưi čan mâo lu, mjing klei găl kơ klei đĭ kyar.”

 Djŏ tuôm kơ bruă hlue ngă Hdră bruă 1” Đru msir mgaih klei kƀah lăn dôk, sang dôk, lăn mkra mjing, êa yua”, hlăm hdră kñăm ala čar kơ klei mđĭ kyar bruă duh mkra- ala ƀuôn krĭng mnuih djuê ƀiă leh anăn čư̆ čhiăng, Trường Trung Tuyến,  K’iăng Khua Knơ̆ng bruă djuê ana čar Gia Lai lač: Thŭn 2022, dŭm alŭ wăl dôk hlăm Hdră bi mklă leh anăn hŏng phung hlăm gŏ êsei ƀun dưi đru kơ sang dôk. Hlăk anăn, dŭm gŏ êsei anei dưi đru čan prăk knơ̆ng prăk čiăng rŭ mdơ̆ng sang dôk. Truh akŏ thŭn 2023, lu gŏ êsei dưi đru amâo lŏ dôk hlăm anăn gŏ êsei ƀun ôh anăn ară anei ăt ka dưi mâo prăk đru kơ sang dôk. Trường Trung Tuyến brei thâo, alŭ wăl dôk mtŭk mtŭl hlăm klei msir mgaih prăk bi liê đru kơ mnuih ƀuôn sang:

            “Ară anei, diñu čan leh prăk knơ̆ng prăk, mnơ̆ng dhơ̆ng dôk nư, ară anei dôk gun kpăk snăn dleh snăk. Hmei mâo leh hră mơar mơĭt kơ Dhar bruă djuê ana čiăng wĭt lač kơ alŭ wăl.”

 Ti anôk bi kƀĭn, bi ala kơ dŭm alŭ wăl kah mbha klei thâo leh anăn lač kơ klei edeu kƀah, gun kpăk hlăm boh sĭt čiăng pŏk ngă dŭm hdră msir hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng. Čiăng pŏk ngă Hdră anei tŭ dưn, Hầu A Lềnh, Khua phŭn bruă - Khua Dhar bruă djuê ana mtă kơ dŭm anôk bruă, alŭ wăl ksiêm hriăm bi klă hdră kčĕ kơ Knơ̆ng bruă sang čư̆ êa čar pŏk hlue ngă:

            “Drei mâo bruă klam ktrâo lač dŭm gưl kdriêk, gưl să. Dŭm bruă hlăm klei dưi mơ̆ng čar snăn čar srăng msir mgaih, amâo guôn dôk guôn gưl dlông ôh. Dŭm alŭ wăl mđĭ bruă bi hgŭm, kah mbha klei hâo hưn, klei thâo. Mtă kơ Knơ̆ng bruă djuê ana dŭm čar jing anôk bruă gĭt gai ti alŭ wăl păn kpăk, grăp mlan brei hưn mdah hnơ̆ng, bruă pŏk ngă si ngă, boh tŭ tăp hnơ̆ng mâo leh anăn ya klei gun kpăk mâo…”

 Gưl anei, Khua phŭn bruă - Khua Dhar bruă djuê ana Hầu A Lềnh  mrâo ngă khua êpul mă bruă mơ̆ng Dhar bruă djuê ana mă leh bruă hŏng čar Quảng Ngãi kơ klei tŭ hlue ngă Hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng thŭn 2022 leh anăn 3 mlan akŏ thŭn 2023.  Hlue si klei hưn, ênoh bi liê prăk hdră anei ti alŭ wăl hlăm thŭn 2022 knŏng mâo giăm 49%; thŭn 2023 knŏng mrâo bi liê giăm 5%. Blŭ hrăm hlăm mmông mă bruă, Hầu A Lềnh lač kơ dŭm bruă čiăng đru čar Quảng Ngãi pŏk ngă tŭ dưn hdră anei:

            Alŭ wăl drei prŏng, kbưi.  Mnuih mâo lu . Hdră anei drei mdê hŏng dŭm hdră kñăm mkăn anăn brei mbha gưl. Anei jing sa hdră kluôm anăn brei mâo klei bi hgŭm čiăng pŏk hluê ngă. Klei bi hgŭm anei brei bi mklă mơ̆ng klei bhiăn mă bruă plah wah dŭm anôk bruă čiăng si bĕ ngă mơ̆ng hdră kčah, msir mgaih klei gun kpăk bi djŏ guôp”.

Êpul mă bruă mơ̆ng Dhar bruă djuê ana srăng bi kƀĭn hưn mdah hŏng Knŭk kna leh anăn dŭm phŭm, dhar bruă ksiêm dlăng mâo dŭm hdră êlan ruh mgaih klei gun kpăk, dleh dlan hlăm hdră pŏk hlue ngă hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng./.