Tlam mbrue 16/10, ti Đà Nẵng, Khua knŭk kna Phạm Minh Chính nao ti anôk bi hdơr 80 thŭn hrue knhuah gru kahan alŭ wăl 5 (16/10/1945-16/10/2025) lehanăn drông mnă mêđai Hồ Chí Minh.

Alŭ wăl 5 jing alŭ wăl “aguah gang angĭn êbŭ, tlan gang mđiă hlơr”, jing leh anôk yuôm bhăn kơ bruă lĭng kahan, bruă răng mgang ala čar. Hlăm dŭm thŭn êgao, êpul lĭng kahan alŭ wăl 5, bi leh jăk bruă čuăn, mkŏ mjing bruă răng mgang kjăp, lehanăn jing êpul knơ̆ng kơ bruă mdrơ̆ng hŏng klei jŭ jhat yan adiê ngă, wăt klei ruă tưp, đru mnuih ƀuôn sang mđĭ kyar klei hdĭp mda, bi hrŏ ƀun... Bi ala kơ phung khua kiă kriê Đảng lehanăn knŭk kna. Khua knŭk kna Phạm Minh Chính mđup brei leh mêđai Hồ Chí Minh kơ êpul lĭng kahan alŭ wăl 5 klei mpŭ mni yuôm bhăn mâo čih pioh kơ ai tiê klei duh myơr, lehanăn knhuah gru kdrăm kpah mơ̆ng lĭng kahan hlăm 80 thŭn mkŏ mjing, bi blah, lehanăn mđĭ kyar. Khua knŭk kna đăo knang kahan alŭ wăl 5 lŏ dơ̆ng mđĭ hĭn knhuah gru leh mâo, gĭr ktĭr bi leh bruă kčah jao, đru mguôp prŏng prĭn kơ bruă rŭ mdơ̆ng lehanăn răng mgang lăn čar.

Ƀri hlăm wưng anei, Khua knŭk kna Phạm Minh Chính nao lehanăn gĭt gai knăm mphŭn pŏk bruă rŭ mdơ̆ng sang knŭk kna čiêm rông ti ƀuôn hgŭm Tây Giang, ƀuôn prŏng Đà Nẵng. Bruă anei hŏng ênoh bi liê êbeh 260 êklai prăk, tĭng srăng bi leh hlăm krah thŭn êdei./.