Mlan 4 yan bhang krĭng Lăn Dăp Kngư msĕ si pui čuh. Ti tač mjuăt klei ngă bruă, dŭm pluh čô kahan ksiêm knhăk čar Dak Lak ăt dôk hriăm mjuăt pô. Sŭt hĕ êa hŏ hang, Trung úy Hứa Văn Hòa brei thâo:

 “Kâo pô mbĭt hŏng jih jang phung knuă druh, lĭng kahan hlăm êpul kahan knhăk amâo mdei klei hriăm mjuăt, hluê hriăm, bi mbŏ klei jhŏng bruă kđi čar. Hmei jêñ jêñ hriăm čăm, ăt msĕ mơh thâo yua dŭm mta phao ktuang mprăp klei kdơ̆ng mblah, klam ngă leh anăn bi leh grăp bruă klam dưi jao.”

Mprăp kơ klei kdơ̆ng mblah hlăm wưng mrâo klei tŭ dưi mrâo hĭn jing mlan 6/2023, êpul kahan knhăk Dak Lak hmar mbĭt hŏng dŭm anôk bruă thơ̆ng kơ bruă mâo mă phung ngă klei măk ƀai mâo phao ktuang ti kdriêk Čư̆ Kuiñ. Hluê si Thượng tá Vũ Thành (77 thŭn) - khua kiă kriê hđăp adŭ bruă kahan ksiêm čar Dak Lak, ti Dak Lak leh anăn krĭng Lăn Dăp Kngư jing alŭ wăl hdră êlan hlăm klei êđăp ênang, mâo nanao phung bi kdơ̆ng duah êlan bi rai. Êbeh 30 thŭn ngă bruă hlăm êpul kahan knhăk, tlă anăp hŏng lu klei arưp aram, klei dleh dưi wơr hĭn hŏng Vũ Thanh jing gưl tiŏ mă thŭn 1977 mă kơ̆ng Hoàng Huân, sa čô păn kŏ Fulrô ti kdriêk Dak Mil:

           “Hoàng Huân mơ̆ng să Đức Minh, Đức Mạnh mbĭt hŏng dua pluh čô Fulro nao hlăm dliê bi mguôp hŏng Trung đoàn 64 Fulro mơ̆ng Y K’lơng. Diñu duah êlan ksŭng mblah mdlưh bruă sang čư êa kdriêk Dak Mil. Hmei pŏk dua gưl tiŏ mă, 5 mmông aguah hruê 6/4/1977, hmei mbha jing 2 êpul tiŏ mă mơ̆ng aguah truh kơ yang hruê ƀuh gru. Hmei hmư̆ ênai đĭng mmuñ diñu pŏk, leh anăn mâo klei bi knăm mơ̆ng diñu hmei nao jĕ leh anăn kâo ƀuh Huân hlŏng mnah 3 asăr ngă kơ Huân lĕ buh leh anăn mâo mă. Tui êmuh Huân dưi thâo ƀuh jih jang diñu leh anăn dŭm pluh čô hlăm anăn yơr kngan lŏ wĭt jih.”

Thượng tá Cao Tiến Phu – Khua adŭ bruă kahan ksiêm čar Dak Lak brei thâo, 50 thŭn êgao, mbĭt hŏng hluê ngă bruă klam răng mgang klei êđăp ênang dŭm anôk bruă kđi čar, bruă duh mkra ala ƀuôn yuôm bhăn mơ̆ng gưl dlông leh anăn alŭ wăl, êpul kahan knhăk čar Dak Lak dưi bi kdơ̆ng hŏng phung ngă soh arưp aram msĕ si tlĕ dŏ dô, mdjiê mnuih, matuĭ…, răng mgang klei êđăp ênang ti alŭ wăl. Dŭm thŭn leh sua wĭt klei êngiê, anôk bruă ngă dŭm êbâo gưi tui mă Fulro, mâo mă dŭm êtuh čô bi kdơ̆ng, hrui mă lu phao ktuang, kdrăp lĭng kahan leh anăn dŭm hră mơar yuôm bhăn. Knŏng ti boh klei hruê 11/6/2023 ti kdriêk Čư̆ Kuiñ, phung knuă druh, lĭng kahan mâo mă 11 čô ngă măk ƀai, hrui mă lu phao ktuang, kdrăp yua.

Thượng tá Cao Tiến Phu brei thâo, knuă druh, lĭng kahan mơ̆ng anôk bruă lŏ dơ̆ng hriăm mjuăt, mđĭ klei jhŏng bruă kđi čar leh anăn klei ngă bruă, mprăp bi kdơ̆ng hŏng djăp mta phung ngă soh hlăm grăp boh klei.

 “Hmei lŏ dơ̆ng bi lar knhuah gru phung jhŏng ktang leh anăn dŭm klei hriăm yuôm bhăn mơ̆ng dŭm gưl khua gĭt gai kahan ksiêm knhăk leh anăn bi mbŏ ai ktang kơ phung knuă druh, lĭng kahan hlăm anôk bruă. Hmei mkŏ mjing klei hriăm mjuăt kơ phung knuă druh, lĭng kahan hlăm anôk bruă. Hmei mtô kơ phung knuă druh, lĭng kahan ƀrư̆ hruê ƀrư̆ thơ̆ng kơ bruă, leh anăn hriăm mkŏ mjing dŭm hdră mgaih msir dŭm boh klei, čiăng răng mgang jăk hĭn klei êđăp ênang hlăm alŭ wăl.

Hlăm dŭm thŭn, hŏng dŭm klei tŭ dưn mâo leh, adŭ bruă kahan ksiêm knhăk, kahan ksiêm čar Dak Lak mâo Đảng, knŭk kna mđup brei anăn knăl Pô jhŏng ktang lĭng kahan yang ƀuôn, Mêđai klei tŭ dưn mrô I, mêdai klei tŭ dưn mrô 3 leh anăn lu mta klei pah mni yuôm bhăn mkăn. Phung knuă druh lĭng kahan knhăk čar Dak Lak hruê anei lŏ čuê knhuah gru jhŏng ktang, năng jing khil gang msei čiăng răng mgang klei êđăp ênang ti alŭ wăl leh anăn klei êđăp ênang kơ mnuih ƀuôn sang dŭm djuê ana ti čar Dak Lak./.