VOV4.Êđê - Aguah mbruê 15/4, anôk bruă kahan ksiêm êlan klông leh anăn kahan ksiêm hlăm êlan klông kluôm ala mkŏ mjing bruă ruê̆ kahan rơ̆ng klei êđăp ênang hlăm êlan klông ƀri wưng knăm hruê 30/4 – 1/5. Klei ruê̆ kahan anei srăng mkŏ mjing hlăm wang sa mlan, kñăm bi hrŏ klei bi drăm êdah êdâo, klei kpăk hlăm êlan klông, boh nik jing ti dŭm ƀuôn prŏng leh anăn dŭm êlan dơ̆ng prŏng.

Hlăm gưl ruê̆ kahan anei, êpul êya kahan ksiêm êlan klông srăng dưi yua klei kreh knhâo mrâo mrang hlăm bruă gak răng, ktuê dlăng hlăm êlan klông, dưn yua dŭm hdră klei kreh knhâo mrâo mrang čiăng hmao ƀuh, ƀuah mkra klei ngă soh. Mbĭt anăn mđĭ hĭn bruă ktuê dlăng, ƀuah mkra dŭm klei ngă soh hlăm êlan klông, kñăm kơ dŭm mta klei ngă soh jing phŭn agha truh kơ klei bi drăm, klei kpăk hlăm êlan klông, rơ̆ng leh anăn bi lar mâo boh tŭ dŭm êpul bi mguôp plah wah kahan ksiêm êlan klông leh anăn dŭm êpul êya kahan ksiêm mkăn čiăng hmao ƀuh, ƀuah mkra phung mâo klei čŏng ngă soh hŏng klei êđăp ênang hlăm êlan klông, bi mguôp hŏng bruă bi mdơ̆ng, gang mkhư̆ phung ngă soh.

Y- Khem pô mblang