VOV4.Êđê - Mbĭt hŏng bruă klam kdơ̆ng mblah, gang mkhư̆ phung ngă soh, phung kahan ksiêm ti Adŭ bruă kahan knhăk, Anôk bruă kahan ksiêm čar Dak Lak kreh mkŏ mjing hdră mđing kơ nah gŭ, đru kơ mnuih ƀuôn sang duh mkra pla mjing, hrui êmiêt mnơ̆ng lŏ hma. Dŭm hdră anei đru bi kjăp leh klei khăp lehanăn bi hgŭm mguôp lĭng kahan hŏng mnuih ƀuôn sang, lŏ bi siam pŏk rup kahan ksiêm yang ƀuôn hŏng mnuih ƀuôn sang.

Ti ƀuôn Tơ̆ng Drŭn, să Čư̆ Nĕ, kdriêk Krông Ƀŭk, čar Dak Lak, 30 čô kahan ksiêm dôk mjêč waih hnoh êa leh anăn jah waih rơ̆k phĭt, mkra wĭt pin êa. Thượng úy Nguyễn Thị Khánh Vân, k’iăng khua bruă hđeh êdam êra nah gŭ, adŭ bruă kahan ksiêm knhăk čar Dak Lak brei thâo, dŭm gưl trŭn kơ bruă kyua yang ƀuôn mâo nanao anôk bruă mkŏ mjing čiăng đru kơ mnuih ƀuôn sang hlăm dŭm alŭ ƀuôn. “Anei jing sa mta bruă hmei ba ai hlăk thŭn mda, klei gĭr ktưn leh anăn ai tiê pô mđing truh kơ yang ƀuôn, ba dŭm bruă ngă mơ̆ng êpul êya kahan ksiêm truh ti dŭm krĭng taih kbưi, krĭng dleh dlan čiăng đru kơ mnuih ƀuôn sang.”

Hlăm gưl anei, phung lĭng kahan srăng ngă bruă waih mă djah djâo 300m mnuôr êa, jah waih rơ̆k phĭt, bi doh sang yang ƀuôn ti ƀuôn Đrao leh anăn ƀuôn Tơ̆ng Drŭn, să Čư̆ Nĕ, bi mguôp hŏng bruă hâo hưn klei bhiăn ala čar leh anăn iêo mthưr ai dưi mđup brei 50 hnư mnơ̆ng kơ dŭm gŏ sang dleh dlan. Hluê si Y-Bliu Mlô, k’iăng huă Dhar bruă mặt trận să Čư̆ Nĕ, anei jing 2 ƀuôn dleh dlan hĭn hlăm să hŏng giăm 500 gŏ sang, 2.000 čô mnuih ƀuôn sang, lu hĭn jing mnuih djuê ana Êđê. Kyua klei đru mơ̆ng phung knuă druh lĭng kahan dưi đru leh kơ mnuih ƀuôn sang mdul ƀiă klei dleh dlan, dưi gĭr kưn kpưn đĭ “Klei hdĭp mnuih ƀuôn sang knŏng jing bruă lŏ hma, dleh dlan êdi. Hlăm gưl mđup brei anei hmăng hmưi mnuih ƀuôn sang gĭr ktưn čoh bruă ngă hma. Bi ala kơ mnuih ƀuôn sang mâo klei mơak sơnăk, mâo klei lač jăk leh anăn lŏ dơ̆ng rơ̆ng, đru kơ mnuih ƀuôn sang, boh nik hlăm wưng ară anei”.

Hŏng grăp čô kahan knhăk, grăp blư̆ trŭn kơ bruă jing wưng găl čiăng kơ diñu wĭt hŏng ƀuôn sang, jĕ giăm hŏng mnuih ƀuôn sang, hriăm dŭm klei thâo čung ba mnuih ƀuôn sang. Trung sĩ Y-Sen Mdrang brei thâo: “Hlăm dŭm gưl nao ngă bruă, hmei dưi mkŏ mjing dŭm klei mjĕ giăm hŏng mnuih ƀuôn sang, bi mguôp hdơ̆ng pô kah mbha klei mta bruă hlăm klei hdĭp grăp hruê mơ̆ng mnuih ƀuôn sang. Mjĕ êrô hŏng mnuih ƀuôn sang ƀuh khăo kơ mnuih ƀuôn sang hĭn, čiăng đru kơ diñu hŏng jih ai tiê mơ̆ng lĭng kahan mda asei”.

Thiếu tá Hoàng Thị Kim Phượng, Khua êpul bruă kđi čar nah gŭ, adŭ kahan ksiêm knhăk brei thâo, sa ai hŏng hdră “Kahan ksiêm čar Dak Lak mđing truh kơ nah gŭ, mkŏ mjing klei mjĕ giăm jăk hŏng mnuih ƀuôn sang”, grăp thŭn anôk bruă mkŏ mjing lu mta bruă mđĭng kơ nah gŭ, ngă bruă jăk kyua yang ƀuôn. Sa gưl nao ngă bruă truh kơ dŭm hruê kăm, phung lĭng kahan wĭt ti ƀuôn sang srăng dôk tinăn, mă bruă đru kơ mnuih ƀuôn sang. Msĕ hŏng thŭn 2021, khădah klei ruă tưp Covid-19 dleh dưi ksiêm dlăng, anôk bruă ăt mkŏ mjing 7 gưl trŭn kơ bruă, iêo mkrum êbeh 320 êklăk prăk đru kơ mnuih ƀuôn sang. Knŏng mơ̆ng akŏ thŭn ttruh kơ ară anei, anôk bruă mkŏ mjing leh 5 mta bruă mđing kơ ƀuôn sang krĭng taih kbưi, krĭng dleh dlan. “Bi klă klei yuôm bhăn čiăng mkŏ mjing klei bi mguôp plah wah lĭng kahan leh anăn mnuih ƀuôn sang hlăm alŭ wăl čar, grăp thŭn adŭ bruă kahan ksiêm knhăk gĭt gai leh kơ dŭm anôk bruă, lĭng kahan hluê ngă dŭm bruă jăk, čŏng đru kơ nah gŭ, kơ dŭm anôk mă bruă, đru kơ mnuih ƀuôn sang, boh nik jing mnuih ƀuôn sang mnuih djuê ƀiă, krĭng tiah kbưi. Hlăm dŭm bruă ngă anăn srăng kđăm hlăm grăp čô knuă druh, lĭng kahan hmei, dưi ƀuh dŭm klei dleh dlan, suăi êmăn mơ̆ng mnuih ƀuôn sang leh anăn đru sa kdrêč bi hơĭt klei hdĭp, bruă duh mkra kơ mnuih ƀuôn sang.

Êlâo kơ anăn, 50 čô knuă druh, lĭng kahan adŭ bruă kahan ksiêm knhăk, čar Dak Lak ăt mkŏ mjing leh hdră čŏng nao đru bruă ti alŭ wăk Să Yang Tao, kdriêk Lăk. Mbĭt hŏng êpul găk răng, ksiêm dlăng klei êđăp ênang, rang mgang klei êđăp ênang êlan klông hlăm alŭ wăl să mkŏ mjing leh klei hâo hưn, mtrŭt mjhar mnuih ƀuôn sang hluê ngă jăk hdră êlan, hdră mtrŭn mơ̆ng Đảng, klei bhiăn ala čar leh anăn djăp hdră bhiăn hlăm alŭ wăl. Ti nei, phung lĭng kahan ngă leh bruă bi doh wăl hdĭp mda hlăm dŭm bĭt êlan krĭng ƀuôn sang, nao đru mnuih ƀuôn sang hrui wiă mdiê.

Hlăm brô ƀiă hruê mmông ngă bruă đru kơ mnuih ƀuôn sang hlăm dŭm ƀuôn êlan, grăp čô lĭng kahan mâo na nao klei mĭn amâo hŭi kơ klei suăi êmăn leh anăn hrăm mbĭt đru mdul klei klei dlan kơ mnuih ƀuôn sang, lu hlăm anăn jing mnuih djuê ƀiă, dôk mâo klei dleh dlan hlăm lu mta bruă.

Dŭm gưl trŭn kơ bruă wĭt hŏng ƀuôn sang mơ̆ng phung kahan ksiêm knhăk ti čar Dak Lak dưi đru hlăm bruă rơ̆ng klei êđăp ênang, bi mguôp kjăp hĭn plah wah lĭng kahan, mnuih ƀuôn sang, mkŏ mjing rup, klei kđăm siam kơ pô kahan ksiêm yang ƀuôn “Kyua ala čar wơr asei, kyua mnuih ƀuôn sang đru bruă”.