75 thŭn êlâo, êpul kahan ksiêm yang ƀuôn mâo klei myun lehanăn myưng mơang mâo tŭ mă 6 mta klei Khua gĭt gai Hồ Chí Minh kơ “knhuah kahan ksiêm  cách mạng”. Anei yơh jing klei tă êlan yuôm bhăn mơ̆ng khua gĭt gai Hồ Chí Minh kơ knhuah dôk dơ̆ng ƀơ̆ng huă, kơ ai tiê klei jhŏng kmlăn, knhuah k’hưm ngă bruă mơ̆ng mnuih kahan ksiêm cách mạng Việt Nam. Găn leh hlăm dŭm ênuk, mơ̆ng klei biblah sua mă klei êngiê kơ djuê ana, mhluh lir lăn čar, khădah hlăm ya klei bi blah sua wĭt klei êngiê kơ djuê ana, bi hluh lir lăn čar êlâo dih amâodah hlăm ênuk mlih mrâo lăn čar, rŭ mdơ̆ng lehanăn răng mgang lăn čar ară anei, êpul lĭng kahan yang ƀuôn păn kjăp knhuah klei khua gĭt gai Hồ Chí Minh mtă mtăn. Pô ngă bruă klei mrâo Nhị Lê, jing k’iăng khua kiă kriê hră kklei mrâo Tạp chí Cộng sản lač:

        “Năm mta klei khua gĭt gai Hồ Chí Minh mtă mtăn kơ kahan ksiêm yang ƀuôn mâo truh  51 chữ, ƀiădah hlăm anăn êdah jih klei Khua gĭt gai Hồ Chí Minh čiăng hŏng êpul pô, bi êdah klei đăo knang sĭt êmĭt kơ êpul kahan ksiêm yang ƀuôn, hŏng klei jing sa hlăm dua ƀĕ kngan hrăm mbĭt hŏng êpul lĭng kahan yang ƀuôn răng mgang kơ đảng, răng mgang knŭk kna, răng mgang mnuih ƀuôn sang. Ti anăn drei ƀuh klei mĭn mơ̆ng ñu jing msĕ si giê ktrâo brei êlan, jing leh boh kdrŭt prŏng mđĭ ai phung kahan ksiêm yang ƀuôn ƀrư̆ ƀrư̆ hlăm bruă cách mạng răng mgang lehanăn rŭ mdơ̆ng lăn čar yang ƀuôn ngă phŭn êngiê”.

        Nai prŏng, nai prĭn Hoàng Chí Bảo, pô truăn kơ bruă mơ̆ng gưl dlông, jing khua hlăm Êpul Gơ̆ng hlak mblang gưl dlông lač, lăn čar drei hlăk čhuang nao hlăm klei mlih mrâo kluôm dhuôm, lehanăn mâo klei bi mlih jih jang hŏng klei tuh tia, ênuk mrâo mrang, čŏng ñŭ kma hŏng tač êngao, êjai boh klei dlông rŏng lăn, lehanăn hlăm alŭ wăl dleh dưi ksiêm dlăng, hmăi amâo mâo jăk kơ bruă răng mgang klei êđăp ênang. Čiăng dưi ngă jăk bruă čuăn răng mgang Đảng, răng mgang knŭk kna, răng mgang mnuih ƀuôn sang, răng mgang kjăp klei êđăp ênang yang ƀuôn, mbĭt hŏng anăn êpul kahan ksiêm yang ƀuôn klă sĭt mâo mjuăt bi hriăm knhăk, ênuk mrâo, păn kjăp 6 mta klei Awa Hô mtă kơ kahan ksiêm bŏ hŏng klei yuôm bhăn:

        “6 mta klei Bác mtă lač ênŭm kơ knhuah dôk dơ̆ng ƀơ̆ng huă, wăt hlăm bruă kđi čar lehanăn kơ dhar kreh. Jing êdah êdi kơ klei blŭ tlao nao hriê, kơ knhuah hdĭp jing dhar kreh, ênuah ênô lehanăn awa lač kpă ênuah klei hdĭp. Ară anei jih jang drei bi hriăm mjuăt kơ knhuah dôk dơ̆ng ƀơ̆ng huă, bi năng hŏng klei mnuih ƀuôn sang đăo knang. Ai êwa mơư̆ng 6 mta klei mtă anăn jing klei thâo bi mjĕ êrô hŏng mnuih ƀuôn sang, thâo mpŭ kơ mnuih ƀuôn sang. Kyuadah kahan ksiêm jing mah jiăng mnuih ƀuôn sang, msĕ hŏng klei awa blŭ snăn jing anâo mâo djŏ knŏng klei blŭ bi myâo mă mơ̆ng ƀăng êgei ôh ƀiădah bi êdah hŏng bruă ngă, čiăng kơ mnuih ƀuôn sang đăo knang, mnuih ƀuôn sang khăp, mnuih ƀuôn sang đru, mnuih ƀuôn sang răng mgang snăn kơh srăng mâo klei tŭ dưn”.

        Čiăng lŏ dơ̆ng hriăm nanao 6 mta klei Awa Hô mtă, êpul kahan ksiêm yang ƀuôn, Khua gĭt gai Đảng Nguyễn Phú Trọng mâo klei mtă hŏng êpul kahan ksiêm hlăm kluôm ala brei mđing hĭn ngă jăk jih 3 mta kñăm phŭn anăn jing hriăm mjuăt, kut kat hlue gưt, lehanăn mâo klei bi hmô ba akŏ. Mđĭ hĭn klei tui hriăm, hlue ngă 6 mta klei awa Hô mtă brei dưi jing bruă ngă nanao, hlăm grăp hrue hlŏng jing knhuah hdĭp, klei mĭn knhuah ngă bruă hlăm êpul kahan ksiêm yang ƀuôn. Khua gĭt gai Đảng Nguyễn Phú Trọng mtă:

"Grăp čô knuă druh, kahan ksiêm brei ksiêm wĭt pô nanao, čŏng mjuăt bi hriăm, brei thâo tui duah klei tŭ mơ̆ng 6 mta klei awa mtă, boh nik čŏng mjuăt bi hriăm asei mlei pô djă pioh kjăp knhuah thâo mkiêt mkriêm, kreh kriăng, ênuah ênô. Kyua anăn jing knhuah dôk dơ̆ng ƀơư̆ng huă nao mđrĭng hŏng bruă ngă thâo bi êdah hlăm klei dôk dơ̆ng ƀơ̆ng huă hlăm grăp hrue. 6 mta klei awa mtă kahan ksiêm yang ƀuôn jing leh klei mtă mtăn hŏng sa êpul yuôm bhăn mâo klei tŭ dưn êdi tơdah thâo djă yua hŏng klei sĭt êmĭt”.

        Dăl hlăm 75 thŭn êgao, 6 mta klei awa Hô mtă kơ “knhuah kahan ksiêm cách mạng” ăt adôk nanao klei tŭ dưn ñu ba kơ ară anei, boh nik hŏng ênuk ară anei, êjai kluôm Đảng, jih jang mnuih ƀuôn sang, lehanăn lĭng kahan kut kat hlue ngă hdră mtrŭn gưl dlông 4 gưl 13 kơ bruă mkŏ mjing, ƀư̆ mkra Đảng; hriăm lehanăn hlue ngă knhuah mngač Hồ Chí Minh. Mđĭ hĭn knhuah gru jhŏng ktang, êpul kahan ksiêm yang ƀuôn lŏ dơ̆ng hriăm bni kjăp hĭn 6 mta klei awa Hô mtă kơ kahan ksiêm, mjuăt hriăm knhuah bruă kđi čar, knhuah bhiăn cách mạng, mkŏ mjing klei jăk yâo mơ̆ng kahan ksiêm cách mạng “Kyua lăn čar wơr asei mlei - kyua mnuih ƀuôn sang ngă bruă”./.