Gŏ sang Sầm Văn Khiàng jing sa hlăm dua gŏ sang dleh dlan hĭn êdi ti krĭng knông lăn Nặm Đông, să Cần Nông (Hà Quảng) mâo kđông kahan răng mgang knông lăn Cần Yên đru 4 drei ŭn pioh rông. Knuă druh lĭng kahan kreh nao ktrâo atăt mkra brei war êning, răng mgang klei ruă tưp kơ ŭn. Truh wưng tết Nguyên đán leh êgao, mâo yơh sa ênoh prăk mơ̆ng bruă čhĭ ŭn anei, pioh blei mprăp mnơ̆ng dhơ̆ng Tết djăp ênŭm hĭn. Khiàng mgei ai tiê lač:

:  Kâo dôk tal êlâo ti ƀuôn adih, mrâo mâo êbeh 2 thŭn hŏng anei hriê dôk kơ anei snăn klei hdĭp lĕ hlăm klei dleh dlan snăk. Mâo kahan răng mgang knông lăn đru mjeh ŭn pioh rông, đru leh hmei dưi lŏmâo thiăm prăk kăk brei anak aneh nao sang hră mơar, blei mprăp mnơ̆ng mnuă kơ digơ̆ hriăm hră mơar, lehanăn lŏ blei êa ksâo, lehanăn braih huă hlăm sang. Kâo mâo klei lač jăk kơ kahan răng mgang knông lăn lu êdi”.

Kđông kahan răng mgang knông lăn Cần Yên mâo jao kiă kriê alŭ wăl dua boh să Cần Nông lehanăn Cần Yên, jih jang klei dleh dlan hlăm kdriêk Hà Quảng (Cao Bằng) hŏng hnơ̆ng ênoh gŏ êsei ƀun êgao kơ 50%. Čiăng dưi ngă mta kñăm mkŏ mkra krĭng ƀuôn sang mrâo, kđông bi hgŭm leh hŏng bruă sang čư̆ êa dŭm boh să ksiêm dlăng jih jang mta kñăm kơ bruă knuă srăng ngă, truh hlăm grăp boh ƀuôn pioh thâo mkŏ mjing hdră mă bruă. Mâo hdră đru bi djŏ hŏng hŏng grăp anôk mdê mdê. Êngao kơ mnơ̆ng pla mjing, mjeh mnơ̆ng rông, phung lĭng kahan răng mgang knông lăn lŏ đru dŭm êtuh hrue ai mă bruă hlăm grăp thŭn nao mkra êlan klông, mkra wĭt pưk sang, bi mdoh wăl hdĭp mda mkra mjing war êning krư̆ kđăl mnơ̆ng rông, mtrŭt mnuih ƀuôn sang amâo mâo lŏ krư̆ mnơ̆ng rông hlăm gŭ krum sang pô dôk ôh. Tui si hdră mtrrŭn mơ̆ng bruă Đảng kahan răng mgang knông lăn   čoh čuăn grăp thŭn bi mâo đru 2 gŏ êsei tlaih mơ̆ng klei dleh dlan.

 Trung tá Nông Văn Ích, Pô ngă bruă kđi čar hlăm kđông Cần Yên brei thâo: Kyua 2 boh să mâo truh 21 boh ƀuôn, lehanăn mâo đa đa ƀuôn êbat jơ̆ng luič jih mmông mơh dưi truh kơ krah să, snăn klei duh bi liê dôk ling lang bŏ hŏng klei dleh dlan. Êpul kahan kčĕ leh kơ bruă sang čư̆ êa alŭ wăl mâo hdră ngă mrâo, tŭ dưn hĭn:

“Thŭn 2022, Kđông mâo kčĕ leh hŏng gưl bruă Đảng, bruă sang čư̆ êwa să Cần Yên ngă klei bi hmô mkŏ mkra krĭng ƀuôn sang mrâo ti 3 boh ƀuôn, bi ară anei amâo mâo djăp ai dưi ngă ôh, leh kơ klei anăn ciăng ksiêm wĭt, mă klei hriăm duah hdră êlan mă bruă bi djŏ hĭn, pioh mkŏ mkra hlăm dŭm boh ƀuôn adôk ti 2 să hrăm mbĭt bi tui hriăm lehanăn hlue ngă”.

Cao Bằng mâo klông knông lăn êbeh 330km găn hlăm 40 să, wăl krah. Jih jang dŭm boh să dôk hlăm klei dleh dlan sơăi, mnuih ƀuôn sang raih dôk kbưi, hnơ̆ng ênoh gŏ êsei ƀun jing prŏng, êlan klông amâo mâo. Hlăm dŭm alŭ wăl anei, kahan răng mgang knông lăn yơh jing knơ̆ng pioh mkŏ mkra krĭng ƀuôn sang mrâo, lehanăn bi kjăp bruă kđi čar, bi hriăm klei bhiăn knŭk kna, lehanăn bruă răng mgang klei êđăp ênang yang ƀuôn. Đại úy Trần Tuấn Ngọc, Cán bộ đồn Biên phòng Quang Long, huyện Hạ Lang cho biết:

“Hlăm knông lăn adôk lu snăk gŏ êsei lĕ hlăm klei dleh dlan, kyua anôk hdĭp mda taih kbưi, mnuih ƀuôn sang kƀah klei thâo săng, êlan klông dleh dlan. Leh mâo Knơ̆ng kiă kriê kahan răng mgang knông lăn kčĕ đru tiŏ nao phung đảng viên nao đru čung ba grăp gŏ êsei mnuih ƀuôn sang, kđông đru mnuih ƀuôn sang thâo duh ƀơ̆ng, thâo săng kơ klei bhiăn, thâo dăp bruă knuă bi jăk hĭn, mđuĕ krư̆ kđăl mnơ̆ng rông mơ̆ng gŭ krum sang, mđĭ hĭn bruă duh mkra pla mjing pioh kơ klei čhĭ mnia”.

Bi ti dŭm alŭ wăl jing čư̆ čhiăng, krĭng dlông klei hdĭp mnuih ƀuôn sang ƀai hĭn knap mñai, snăn bruă čiăng iêo jak lklei mkŏ mkra krĭng ƀuôn sang mrâo amâo amâo djŏ ênưih ôh. Kyuanăn, grăp kđông kahan mă bruă mâo hdră êlan mdê mdê thâo dưn yua jăk jih jang klei găl mơ̆ng grăp anôk. Thượng tá Sái Văn Hùng, Pô ngă bruă kđi čar mơ̆ng kđông kahan Lũng Nặm, Knơ̆ng kiă kriê kahan răng mgang knông lăn čar Cao Bằng ăt brei thâo, bruă nao hlăm klei mkŏ mkra krĭng ƀuôn sang mrâo jing bruă čuăn yuôm bhăn đru bi kriê kjăp klei êđăp ênang ti knông lăn, răng mgang kjăp klei dưi êngiê kơ pô:

“Anei jing dŭm boh phŭn mâo leh bruă Đảng kahan răng mgang knông lăn čar lehanăn dŭm kđông răng mgang knông lăn bi klă bruă čuăn tal êlâo kơ pô. Đru mnuih ƀuôn sang jing đru êpul kahan răng mgang knông lăn yơh, mă mnuih ƀuôn sang jing knơ̆ng, mơ̆ng anăn duh kơ klei hdĭp mnuih ƀuôn sang jing tal êlâo, čiăng kơ digơ̆ sĭa suôr hĭn hŏng knông lăn, hrăm mbĭt hŏng kahan răng mgang knông lăn bi răng mgang kjăp klei dưi êngiê lăn čar, klei êngiê ti knông lăn”.

Hlăm ênoh 17 boh să djăp ênoh čuăn krĭng ƀuôn sang mrâo ti Cao Bằng mâo leh lu să ti knông lăn msĕ si Đức Long (Thạch An), Sóc Hà, Trường Hà (Hà Quảng) Đàm Thủy, Ngọc Côn (Trùng Khánh) Thị Hoa (Hạ Lang)... Anei jing boh tŭ dưn năng čih pioh mơ̆ng bruă sang čư̆ êa, mnuih ƀuôn sang, lehanăn mâo klei bi mguôp mơ̆ng kahan răng mgang knông lăn, jing leh boh kdrŭt yuôm bhăn mđĭ ai phung ƀuôn sang, să knông lăn bi leh mta kñăm mkŏ mkra krĭng ƀuôn sang mrâo, đru hlăm klei ba klei trei mđao,jăk mơak kơ mnuih ƀuôn sang ti krĭng knông lăn Ngŏ Dưr./.