Dlăng êa poh yă blŭk blŭk, plao ksĭ Côlin êdah msĕ si sa boh kđông dôk đung dlông êlah êa hlăm krah êa ksĭ prŏng. Kđông anei tơl phung kahan bi lač msĕ si kđông 5 kiêng. Plao ksĭ dôk ti dlông atur sanho êngăp êa, kyua anăn yơh klei hdĭp phung kahan dôk hlăm klei dleh dlan êdi. Hŏng klei hdĭp hjăn, adiê amâo mâo jăk, grăp thŭn phung kahan plao ksĭ Colin găn 6 mlan adiê không mđiă ktang, 6 mlan hjan hlĭn. Dŭm hrue mâo êa ksĭ poh yă prŏng, angĭn ktang, hmăi amâo mâo jăk ôh êdi kơ klei hdĭp phung kahan hlăm plao ksĭ, ƀiădah amâo mâo uêñ ôh hŏng klei dleh dlan anăn hrue mlam phung kahan păn kjăp phao ktuang răng kriê klei êđăp ênang hlăm plao ksĭ, lehanăn wăl adiê lăn čar pô. Thiếu tá Nguyễn Xuân Duy, khua kiă kriê plao ksĭ Cô Lin lač:

    Dŭm gưl leh phung knuă druh, lĭng kahan hlăm plao ksĭ Cô Lin ăt păn kjăp ai tiê knhuah gru mơ̆ng plao ksĭ jing bruă yuôm bhăn, mâo nanao ai tiê thâo gĭr hriăm mjuăt, ngă bruă, jih jang đru bi răng kriê klei êđăp, klei dưi êngiê êa ksĭ, dôk hlăm knuă pô klam bruă.

Hlăm dŭm thŭn êgao phung kahan hlăm dŭm plao ksĭ ti Trường Sa kiă kriê kjăp anôk kñăm, mghaih msir djăp mta boh klei hŏng klei pral, dŭm boh hô̆ mran mơ̆ng ala tač êngao čhuak soh hlăm wăl êa ksĭ pô. Tui si Trung tá Trần Danh Hoàng, Khua kiă kriê plao ksĭ Sinh Tồn: Phung kahan dôk ngă bruă hlăm plao ksĭ amâo mâo hrue mdei ôh, mprăp nanao ai tiê kơ klei bi blah, anăn yơh jing bruă čuăn tal êlâo. Jih jang ya mta klei bi ênai hlăm êa ksĭ mâo păn kjăp mtam, mđing dlăng tui ksiêm lehanăn hâo hưn bi pral čiăng mâo mtam hdră mghaih msir klă, djŏ, amâo mâo lui boh klei lĕ hlăm klei kdjăt, lehanăn dleh mghaih msir.

 Hmei truh hlăm plao ksĭ jing čiăng răng kriê, ngă bruă čuăn, anei jing bruă yuôm bhăn mâo jao kơ phung kahan, lehanăn anak Việt nam pô. Kiă kriê plao ksĭ mjuăt bi hriăm lĭng kahan thâo săng klă mngač kơ klang êrah, ai tiê aê ama pô êlâo dih. Bruă klam mơ̆ng grăp gưl tơdah leh čhuang jơ̆ng truh hlăm plao ksĭ Trường Sa snăn brei mđĭ jing mdua, jing mtlâo, mâo nanao klei thâo gĭr amâo mâo mdei mtam kơ lăn čar, čiăng kơ mnuih ƀuôn sang ti lăn hang hơĭt ai tiê hĭn. Hmei păn kjăp nanao phao ktuang ti kngan, mjing anôk jăk kơ phung hiu trah mă kan jưh knang êjai kiă kriê êa ksĭ.

Ti plao ksĭ Trường Sa anei, adiê mbha ngă dua yan anăn jing yan bhang không lehanăn yan hjan. Lehanăn amâo mâo êa mur gŭ lăn ôh, snăn klei yua êa hjan bŏ hŏng klei mkiêt mkriêm snăk. Hlăm yan bhang, grăp čô kahan knŏng mâo mă ênoh čuăn dưi yua mơ̆ng 3-5 lit êa yua hlăm sa hrue. Ƀĭdah ƀuh hlăm plao ksĭ ăt mtah mda mơ̆ng ana kyâo lehanăn djam mtam, dưi mâo hĕ klei mtah mda anăn jing ai tiê êa hŏ hang phung kahan hlăm plao ksĭ yơh. Thiếu tá Võ Văn Hiệp ti plao ksĭ Đá Đông A lač: Dôk ti anăp klei dleh dlan, lĭng kahan plao ksĭ Trường Sa mơ̆ng gưl anei truh gưl mkăn bi mta mtăn nanao hdơ̆ng găp hdră dưi dôk hlăm mđiă, thâo tram hlăm hjan.

Khădah dôk hlăm klei dleh dlan, ƀiădah leh jih mmông mjuăt bi hriăm hmei ăt hnêč mmông nao mjut mjing, dlăng kriê war bưn pla mjing djam mtam. Êa yua bŏ hŏng klei mkiêt mrkiêm snăk, êa pač ƀô̆ lŏ krih djam. Mâo đa đa adiê mlam mmăt hmei mtrang pui pit nao hiu mă hluyăt hlăm bưn djam. Klei mtah mda mơ̆ng mnơ̆ng pla, ana kyâo lehanăn mnga mda siam... Brei kơ hmei mdul klei suăi êmăn leh mmông mjuăt hriăm. Mâo klei mĭn pătdah jĕ hŏng lăn hang hĭn.

 Hdĭp nanao hlăm krah mđiă, hlơr, angĭn hjan jêñ jêñ hlăm plao ksĭ anei lu jing ti dlông sanhô, lehanăn čuah kô̆, êa kba knŏng dôk guôn mơ̆ng adiê hjan. Khădah snăn, ƀuh ti ală mta djam mtam, djam bei, hruĕ plai giêt, djam puăn, ana tei hŭng ăt čăt đĭ mboh bi kyut, dŭm phŭn ana kyâo mtah, ana kyâo bi msiam, mâo gut mkra hŏng kiê kngan mbruă lĭng kahan hlăm plao. Khădah klei hdĭp dôk kƀah hlăm djăp mta hĭn mkă hŏng lăn hang, ƀiădah ai tiê phung kahan hlăm dŭm boh plao ksĭ bi klă nanao păn kjăp bruă čuăn bi blah, răng mgang kjăp klei dưi êngiê êa ksĭ, plao ksĭ lăn čar pô. Thượng tá Nguyễn Công Chính, pô ngă bruă kđi čar ti plao ksĭ Trường Sa lač: Mâo ngă bruă ti plao ksĭ Trường Sa jing klei myưng m’ang, jing klei myun hŏng grăp čô kahan.

Hmei păn kjăp nanao klei mĭn bi leh jăk bruă čuăn jao, djă kriê kjăp knhuah gru jăk siam mơ̆ng lĭng kahan êa ksĭ, klei thâo săn asei mlei, duh myơr mơ̆ng dŭm gưl aê ama pô êlâo leh. Hmei bŏ hŏng klei mơak mơ̆ng knhuah jăk siam anăn, lehanăn mâo nanao klei bi mtă mtăn hdơ̆ng găp djă pioh ênŭm knhuah gru jăk siam kahan êa Trường Sa jhŏng ktang. Grăp čô kahan Trường Sa jih ai tiê păn kjăp klei hur har, kut kat răng mgang kjăp plao ksĭ, êa ksĭ lăn čar pô. Yap plao ksĭ jing sang, êa ksĭ jing ƀuôn, jih ai tiê răng kriê bi ênŭm dŭm boh plao, boh taih êa ksĭ yuôm bhăn kơ lăn čar.

Hlăk ênuk dôk hdĭp khua gĭt gai Hồ Chí Minh tuôm mtă leh: “Hrue êlâo drei knŏng mâo mlam lehanăn dliê, ară anei drei mâo leh yang hruê, drei mâo adiê, mâo êa ksĭ. Hang ksĭ drei dlông siam, brei drei thâo răng kriê ñu bi jăk”, lĭng kahan lehanăn mnuih ƀuôn sang thâo bi mguôp sa ai tiê, hgao jih klei dleh dlan, mâo nanao klei răng, păn kjăp kngan pô hŏng phao ktuang, mprăp ai tiê kơ klei bi blah, bi leh jăk bruă jao răng mgang kjăp klei dưi êngiê plao ksĭ, êa ksĭ lăn čar pô./.