Khua knŭk kna Phạm Minh Chính bi mni kơ dŭm phŭn, dhar bruă djŏ tuôm hmao hlue ngă klei gĭt  gai mơ̆ng Khua knŭk kna leh anăn pŏk ngă bruă rơ̆ng phŭn mkăp, bi hơĭt ênoh êa săng, êa pui hlăm boh klei rŭng răng ti Msăt boh lăn dleh ktuê dlăng. Mñă klă amâo brei kƀah êa săng, êa pui hlăm ya boh klei, Khua knŭk kna mtă brei bi kna ênoh êa săng, êa pui hlue si anôk ba čhĭ leh anăn Knŭk kna  gĭt gai, hlue ngă hdră msir hơĭt ênoh hŏng klei mbruă, djŏ guôp, tŭ dưn, rơ̆ng leh anăn mâo klei tŭ dưn plah wah Knŭk kna, mnuih ƀuôn sang leh anăn anôk bruă duh mkra; kăm bruă mkăm mnơ̆ng dhơ̆ng, mđĭ ênoh leh anăn mjhua hdră êlan čiăng tŭ dưn kơ pô, ngă rŭng răng kơ anôk ba čhĭ. Khua knŭk kna gĭt gai dŭm phŭn, dhar bruă djŏ tuôm, hlăm anăn mâo Phŭn bruă kahan ksiêm nao ksiêm dlăng leh anăn msir klei ngă soh tăm mâo.

Khua knŭk kna ăt ksiêm dlăng leh anăn bi hrŏ jia, ênoh bi liê djŏ tuôm kơ êa săng, êa pui čiăng đru kơ anôk bruă duh mkra leh anăn mnuih ƀuôn sang hlăm boh klei ară anei, hưn mdah êlâo  hruê 20-3. Hlăm klei găl čiăng êdi, tơdah boh klei bi blah ti Msăt boh lăn sui, brei ksiêmd lăng, hưn mdah hŏng gưl mâo klei dưi ksiêm dlăng mbha prăk knŭk kna čiăng đru bi hơĭt ênoh êa săng, êa pui.