Thượng tướng Lương Tam Quang, Khua hlăm bruă Đảng gưl dlông, K’iăng khua Phŭn bruă kahan ksiêm, khua êpul răng mgang klei êđăp ênang gĭt gai klei kƀĭn. Klei čuăn răng mgang klei êđăp ênang hŏng knăm bi hdơr 70 thŭn hruê mblah dưi Điện Biên Phủ leh anăn dŭm knăm mơak prŏng mâo Phŭn bruă kahan ksiêm bi klă jing lu sơnăk. Hluê si bruă klam dưi jao, hnơ̆ng čuăn, kahan ksiêm dŭm anôk bruă, alŭ wăl hur har hluê ngă, rơ̆ng djŏ hŏng mta kñăm, hnơ̆ng čuăn, hdră kčah mâo leh.

K’iăng khua phŭn bruă Lương Tam Quang mñă ktang, hlăm wưng kơ anăp, mâo 3 hdră yuôm bhăn mơ̆ng lăn čar mkŏ mjing ti Điện Biên leh anăn Đà Nẵng. Kahan ksiêm dŭm anôk bruă, alŭ wăl srăng bi klă klei mĭn hŏng mta kñăm prŏng jing răng mgang klei êđăp ênang kơ dŭm hdră bruă, dŭm klei kƀĭn dưi tŭ jing, amâo mâo brei mâo klei kjăt kƀla, bi kngar. Mñă ktang, anei jing bruă klam kđi čar yuôm bhăn mơ̆ng jih jang êpul kahan ksiêm yang ƀuôn hlăm 6 mlan akŏ thŭn. K’iăng Khua phŭn bruă Lương Tam Quang mñă kơ kahan ksiêm dŭm anôk bruă, alŭ wăl amâo mâo luč klei răng, čŏng pô thâo klă boh sĭt, mgaih msir djăp mta bruă djŏ tuôm hŏng klei êđăp ênang mơ̆ng nah gŭ.