Khua kiă kriê hđăp adŭ Bruă Kƀĭn Ala Bùi Ngọc Thanh jing pô mâo wưng ngă bruă mbĭt hŏng Bruă Kƀĭn Ala Nguyễn Phú Trọng mơ̆ng gưl 11, hŏng Bùi Ngọc Thanh, khua Bruă Kƀĭn Ala Nguyễn Phú Trọng mâo sa klei hdĭp jĕ giăm, thâo khăp:

Hlăm wưng khua Bruă Kƀĭn Ala mrâo đĭ păn bruă, Khua adŭ bruă leh anăn Khua Bruă Kƀĭn Ala mă bruă êngao mmông mă bruă ăt lu sơnăk, kâo hdơr mlan 8/2006, mâo mmông mphŭn pŏk klei kƀĭn Dhar bruă gĭt gai bruă kƀĭn ala tal 42, ăt uêñ mĭn kơ bruă knuă kyuanăn yang hruê dơ̆ng kâo ăt hnêč bi trông thiăm. Khădah mmông anăn mmông anôk bruă bruă mơ̆ng Bruă Kƀĭn Ala ăt dôk kniă điêt, ƀiădah hmei ăt dăp anôk mă bruă mơ̆ng khua Bruă Kƀĭn Ala mâo anôk mdei yang hruê leh anăn anôk drông tuê. Kâo nao anôk mdei yang hruê amâo mâo ƀuh khua Bruă Kƀĭn Ala, nao ti adŭ drông tuê ăt kăn ƀuh lei, nao ti adŭ mă bruă kâo ƀuh dôk ti jhưng djă hră mơar, dôk đih êjai ksiêm duah êjai. Kâo êmuh ñu ya ih đih sơnăn hĕ, ya mâo nao đih ti adŭ mdei, mmông anăn thâo ñu ba wĭt leh adŭ mdei čiăng dăp sa anôk mă bruă mkăn. Sa čô ênang êdi, jĕ giăm êdi. Kâo kreh lač klei hdĭp jĕ giăm mơ̆ng sa čô mă bruă gưl dlông.

Kyua klei jĕ giăm anăn yơh, Khua kiă kriê hđăp Dhar bruă dŭm boh klei yang ƀuôn mơ̆ng Bruă Kƀĭn Ala Nguyễn Thị Hoài Thu hŏng khua Bruă Kƀĭn Ala Nguyễn Phú Trọng, anăn jing sa čô ngă bruă kbiă hruê mơ̆ng mnuih ƀuôn sang, đĭ mơ̆ng mnuih ƀuôn sang:

Hlăm dŭm mmông bi tuôm hŏng phung bi ala kâo ka tuôm ƀuh ôh Nguyễn Phú Trọng dôk ti dlông dlăng brei grăp čô bi pah kngan, ƀiădah đĭ mơ̆ng gŭ, mă kiê kngan dua nah mdhô̆. Leh anăn kơh đĭ dôk kơ dlông hmư̆, wĭt lač. Anăn yơh jing boh tŭ kbiă hriê mơ̆ng mnuih ƀuôn sang, mơ̆ng phung bi ala, amâo djŏ jing pô dôk ti dlông čiăng gĭt gai.

Mâo dua gưl ngă bruă mbĭt hŏng khua Bruă Kƀĭn Ala Nguyễn Phú Trọn, pô bi ala Trần Thị Hoa Ry, k’iăng khua êpul gơ̆ng bruă djuê ana mơ̆ng Bruă Kƀĭn Ala hdơr kơ klei mtrŭn pô mơ̆ng sa čô thâo mĭn, êdah êdi êjai đĭ păn bruă ti hruê 26 mlan 6 thŭn 2006:

Blŭ hrăm đĭ păn bruă khua Bruă Kƀĭn Ala, ñu mâo dua klei duê “Mĭn kơ pô asei êpih msei hŏng siap tăng măng. Gruh mtah thâo bŏ amâodah wil”. Mă klei duê čiăng bi êdah ai tiê pô msĕ sơnăn, drei ăt ƀuh klei mtrŭn pô mơ̆ng ñu êjai dưi jao ngă bruă klam yuôm bhăn anei leh anăn ăt jing klei ƀuăn gĭr ktưn leh anăn bruă klam pô hŏng Đảng, hŏng Bruă Kƀĭn Ala leh anăn hŏng mnuih ƀuôn sang.

Phung bi ala Bruă Kƀĭn Ala ngă bruă hlăm dŭm gưl 11 leh anăn 12 mâo sơăi klei kruăk knăl yuôm bhăn hŏng khua Bruă Kƀĭn Ala Nguyễn Phú Trọng. K’iăng khua kiă kriê hđăp bruă Bruă Kƀĭn Ala čar Thanh Hoá gưl 12 Lê Văn Cuông ăt mgei ai tiê êjai yăl dliê kơ dŭm gưl ngă klei êmuh leh anăn wĭt lač klei êmuh mơ̆ng khua Bruă Kƀĭn Ala Nguyễn Phú Trọng:

Ñu brei kâo dưi êmuh Khua phŭn bruă truh kơ 3 blư̆ leh truh kơ  kâo mdei êmuh kơ ñu mdei. Êjai ƀuh khua phŭn bruă dôk ka thâo wĭt lač ñu mâo klei kčĕ čiăng kơ Khua phŭn bruă kñăm kơ klei wĭt lač. Kyuanăn, klei ksiêm êmuh dưi tŭ jing jăk siam, mâo klei hơ̆k mơak, mâo phung ktuê dlăng yap yuôm bhăn êdi. Awa gĭt gai hŏng hnơ̆ng êlam leh anăn klei thâo mĭn, amâo mâo ngă msĕ đao dlông kmŭt prŏng, mkŏ mjing klei găl kơ phung bi ala Bruă Kƀĭn Ala dưi bi lar, ăt mkŏ mjing klei găl kơ phung Khua phŭn bruă wĭt lač ăt mâo klei hơĭt, jih dua mâo klei kpă brei kơ mnuih ƀuôn sang mâo klei ư ai.

Hŏng phung bi ala gưl tal êlâo nao hgŭm hlăm anôk bruă msĕ si pô bi ala Phạm Nam Tiến, êpul bi ala Bruă Kƀĭn Ala čar Dak Nông, Khua gĭt gai Đảng Nguyễn Phú Trọng jing gru mngač, klei klei bi hmô kơ phung bi ala Bruă Kƀĭn Ala hluê ngă:

Khua gĭt gai Đảng jing pô jĕ giăm, êdu êun, mđing hmư̆ klei blŭ, klei bi mguôp mơ̆ng phung bi ala leh anăn mnuih ƀuôn sang. Leh anăn boh nik êjai khua gĭt gai Đảng lač klei mĭn pô srăng ngă jih ai tiê. Anăn jing rơ̆ng kơ klei đăo knang, kơhưm mơ̆ng sa čô khua gĭt gai, mơ̆ng pô bi ala Bruă Kƀĭn Ala ti anăp mnuih ƀuôn sang, phung bi ala.

Hŏng bruă klam jing khua Bruă Kƀĭn Ala gưl 11, 12, Khua gĭt gai Đảng Nguyễn Phú Trọng bi mguôp hŏng Bruă Kƀĭn Ala, thâo klă kơ klei mkŏ mjing, hdră ngă bruă mơ̆ng Bruă Kƀĭn Ala leh anăn mâo dŭm grŭ kruăk yuôm bhăn êdi:

- Lŏ čuê bruă pô êlâo, mlan 6/2006, êjai dôk păn jing khua bruă kƀĭn ala gưl 11, Khua bruă kƀĭn ala Nguyễn Phú Trọng kiă kriê leh kjăp bruă kƀĭn ala hŏng klei tŭ jing jih gưl. Hlăm sa klei kiă kriê, bruă kƀĭn ala mâo bi mklă leh truh 13 hdră bhiăn, 11 hdră mtrŭn, hlăm anăn, mâo 3 hdră mtrŭn yuôm bhăn êdi kơ hƀuê ênuk, anăn jing bi mklă klei kuôl kă Êpul hgŭm duh mkra amnia mblei dlông rŏng lăn (WTO) mơ̆ng Việt Nam; Hdră mtrŭn kơ hdră êlan čuălk mkă rŭ mdơ̆ng sang bruă kƀĭn ala; lehanăn hdră mtrŭn hlue ngă bruă yuôm bhăn gưl ala čar kơ êwa čuh pui - đạm Bà rịa - Vũng tàu.

-Wưng păn bruă kƀĭn ala gưl XII, bruă kƀĭn ala mâo bi mklă leh 67 hdră bhiăn, 13 hdră mtrŭn. Hlăm anăn mâo lu hdră bhiăn mjing knơ̆ng kơ klei bi kdơ̆ng hŏng klei ƀơ̆ng ngăn, klei amâo mâo djŏ, êdei anei lŏ mâo hdră bhiăn mlih mrâo thiăm mbŏ đa đa mta mơ̆ng hdră bhiăn bi kčŭt hưn klei nga soh, hdră bhiăn lŏ mlih mrâo thiăm mbŏ kơ hdră bhiăn phat mkra klei ngă soh, klei msir kđi yang ƀuôn, hdră bhiăn phưi êngiê mnă, hdră bhiăn kiă kriê, ba yua ngă dŏ knŭk kna...

-Bruă kƀĭn ala gưl 12 mâo klei bi mlih prŏng kơ hdră mkŏ mjing, mđĭ ênoh phung bi ala truăn kơ bruă, dŭm anôk bruă kƀĭn ala, mơ̆ng 8 anôk bruă msĕ hŏng dŭm gưl êlâo mâo lŏ mđĭ leh truh 10 anôk bruă.

-Knhal jih wưng păn bruă 12, mâo klei gĭt gai kjăp mơ̆ng Êpul gơ̆ng klei ruah khua lăn čar, pô djă akŏ jing khua bruă kƀĭn ala Nguyễn Phú Trọng mbĭt hŏng jih jang êpul djă bruă ruah khua hlăm kluôm ala, gưl tal êlâo mkŏ mjing klei ruah khua phung bi ala bruă kƀĭn ala (gưl XIII) lehanăn wăt êpul gơ̆ng bruă ƀuôn sang ti jih 3 gưl (wưng păn bruă 2011-2016) mâoleh klei tŭ jing jăk siam. klei ruah khua mâo mkiêt mkriêm leh hrue mmông, prăk kăk, ai tiê mơ̆ng mnuih ƀuôn sang, lehanăn mjing leh atur kjăp kơ klei ruah khua mgi dih.

Khua bruă kƀĭn ala Trần Thanh Mẫn mñă, Khua gĭt gai Đảng Nguyễn Phú Trọng jing sa čô pô thâo kđi êdi, bŏ hŏng klei mbruă, klei jhŏng, mâo klei kreh knhâo, nao mđrĭng hŏng bruă ngă, mâo klei thâo blŭ mgăl jăk, jing kdlưn hĭn kơ jih klei mĭn aguah tlam. Hŏng 80 thŭn hdĭp, 57 thŭn Đảng, ñu jih klei hdĭp mâo ngă leh bruă jih klei hdĭp kyua lăn čar lehanăn mnuih ƀuôn sang kyua klei hdĭp jăk siam mâo klei thâo bi hmô jăk, hlăm knhuah dôk dơ̆ng ƀơ̆ng huă, jing knhuah cách mạng mơ̆ng sa čô kahan cộng sản, jing sa čô mnuih ngă bruă kđi čar bŏ hŏng klei hing ang, pô thâo hlak mblang prŏng kơ Đảng, jih klei hdĭp duh myơr leh kơ djuê ana, kyua klei jăk yâo mnuih ƀuôn sang:

Hŏng bruă klam jing khua gĭt gai prŏng hĭn hlăm Đảng, dưi klam lu mta bruă yuôm bhăn hlăm Đảng, Knŭk kna jao hlăm anăn mâo bruă jing khua bruă kƀĭn ala gưl 11, 12, ñu siă suôr hŏng bruă kƀĭn ala, thâo săng klă kơ hdră êlan mkŏ mjing, kơ klei mă bruă hlăm anôk bruă kƀĭn ala. Ñu mâo nanao klei mtă mtăn kơ jih jang mnuih brei thâo yua mmông pô bi jăk kơ anôk bruă kƀĭn ala, mâo klei thâo kjăp hlăm bruă knuă, mâo klei thâo mgăl kđi hŏng klei knhêč, ñu mta brei hriăm mơ̆ng mnuih ƀuôn sang, hriăm mơ̆ng klei hdĭp, mơ̆ng hdră êlan hdră bhiăn brei nâo mđrĭng hŏng klei hdĭp mnuih ƀuôn sang, snăn kơh bruă kƀĭn ala srăng dưi mă bruă hlăm klei tŭ jing.