VOV4.Êđê- Hruê mbruê 10/6, ti să Ea Kpam, kdriêk Čư̆ Mgar, čar Dak Lak, êpul grŭp Xuân Thiện mkŏ mjing leh knăm kčưm mkŏ mkra anôk bruă lŏ hma dưn yua kdrăp mrâo mrang Xuân Thiện – Čư̆ Mgar. Anei jing hdră kčưm hlăm čuê êpul dŭm hdră mkra mjing, rông mnơ̆ng, mkra mjing mnơ̆ng ƀơ̆ng huă hŏng kdrăp mrâo mrang mơ̆ng êpul grŭp ti čar Dak Lak, mâo kluôm ênoh prăk duh bi liê êbeh 1 êklai USD, knar hŏng 25.760 êklai prăk. Anôk bruă lŏ hma dưn kyua kdrăp mrâo mrang anei mâo ênoh prăk duh bi liê êbeh 705 êklai prăk, boh prŏng êbeh 100ha hŏng dŭm mta kñăm phŭn: Lông yua leh anăn hrŏng ruah dŭm mta mjeh ana kyâo bruă lŏ hma mâo hnơ̆ng tŭ jăk, amâo mâo mnơ̆ng ngă, mâo lu boh kroh.

Mkŏ mjing klei bi hmô rang mdah bruă mkra mjing bruă lŏ hma dưi yua kdrăp mrâo mrang leh anăn ba jao kdrăp mrâo mrang, mkŏ mjing anôk mkra mjing, kriê pioh leh anăn ba čhĭ boh mnga bruă lŏ hma, mkŏ mjing anôk čuă dlăng, ksiêm hriăm klei thâo ngă bruă lŏ hma leh anăn hiu čhưn ênguê bruă lŏ hma, bi mguôp mtô mjuăt phung knuă druh leh anăn ƀĭng ngă lŏ hma kơ klei ngă bruă dưn yua kdrăp mrâo mrang. Hluê si hdră kčah wưng tlâo mlan tal 4 thŭn 2023 bi leh bruă mkŏ mkra, truh kơ wưng tlâo mlan tal 1/2024 dưi ba čhĭ mnơ̆ng dhơ̆ng.

Pô mblang: Y-Ƀel Êban