VOV4.Êđê- Kdriêk Krông Pač, čar Dak Lak mprăp kơ knăm boh durian Krông Pač. Anei jing mta phŭn mâo khua gĭt gai kdriêk hưn hlăm klei kƀĭn bruă klei mrâo hruê mbruê 22/8. Knăm boh durian kdriêk Krông Pač gưl tal 1, thŭn 2022 hŏng akŏ “Mđĭ hnơ̆ng boh durian kdriêk Krông Pač” srăng klă klơ̆ng kčưm mơ̆ng hruê 1/9 truh kơ hruê 3/9 ti wăl krah Phước An leh anăn đa đa să hlăm kdriêk Krông Pač.

Hlăm anăn anei srăng mâo lu mta bruă msĕ si: Anôk mnia mblei rang mdah dŭm mta boh kroh, boh mnga bruă lŏ hma mơ̆ng kdriêk leh anăn dŭm alŭ wăl jĕ giăm, klei kƀĭn trông iêo mthưr klei duh bi liê leh anăn mđĭ kyar boh mnga bruă lŏ hma, bruă lŏ hma kjăp. Boh nik, hlăm dŭm mta bruă dhar kreh – hưn mdah bruă hiu čhưn ênguê, srăng lŏ mâo thiăm dŭm mta bruă msĕ: phưi Kpŭng mđung hŏng êwa, kdâo adŭ, phưi pui, đĭ mran…

Pô mblang: Y-Ƀel Êban