Knăm bi hdơr, ep ruĕ kahan mphŭn pŏk hŏng 21 boh knŏng hŏng klei mmuiñ ala čar Yang ƀuôn ngă phŭn Việt Nam. Leh anăn jing klei rang mdah mơ̆ng êpul êdeh phiơr dăk wăk mâo hla čhiăm gru Đảng, hla čhiăm gru ala čar phiơr ti knưl bi hdơr. Leh anăn klei blŭ hrăm mơ̆ng Khua knŭk kna Phạm Minh Chính, bi ala kơ lĭng kahan Điện Biên, bi ala kơ ênuk mda asei; Knăm mđup brei medai klei êngiê mrô Sa kơ bruă Đảng, bruă sang čư̆ êa leh anăn mnuih ƀuôn sang dŭm djuê ana čar Điện Biên leh anăn knhal tuč jing klei rang mdah ep ruĕ kahan kdrưh kơăm.

Ênoh phung hgŭm hlăm klei ep ruĕ kahan êbeh 12 êbâo čô. Êpul êdeh dăk wăk phiơr ti dlông dŭm hdră bruă, anôk kriê pioh hƀuê ênuk msĕ si Čư̆ A1, săl msat A1, Knưl bi hdơr mblah dưi Điện Biên Phủ, Sang kriê pioh Điện Biên Phủ... grăp êpul ep ruĕ, kdrưh kơăm nao hlăm knưl bi  hdơr hlue si klei blŭ bi êdah ai ktang yuôm bhăn mơ̆ng klei bi hgŭm jih jang djuê ana ti gŭ klei gĭt gai mơ̆ng Đảng Cộng sản Việt Nam leh anăn Khua gĭt gai Hồ Chí Minh, mjing klei mblah dưi Điện Biên Phủ “kdrưh kơăm hlăm êma krĭng, hing ang tar boh lăn”.