Tui si klei hâo mdah mơ̆ng knơ̆ng bruă sang čư̆ êa čar Khánh Hòa, 9 mlan thŭn anei, klei duh mkra mơ̆ng čar mâo klei đĭ kyar hơĭt, GRDP truh kơ 7%. dŭm bruă lŏ hma, bruă tuh tia, bruă mnia mblei mâo leh klei đĭ kyar jăk. Mâo ba wĭt ngăn prăk kơ knŭk kna êgao kơ hdră kčah. Dŭm bruă duh mkra, bruă hiu čhưn ênguê, lehanăn lu bruă mkăn ƀuh jing hlăk đĭ kyar êdah klă. Phung duh mkra hlăm čar čŏng kpưn đĭ hơĭt hĭn hlăm jih bruă pô pioh čhĭ mnia, amâo lŏ jưh knang mnơ̆ng blei mơ̆ng ala tač êngao ôh. Khánh Hòa lăm lui leh păt čiăng ênŭm sang tĭ ƀrôč, pŏk mlar hdră êlan bi đru kơ bruă mghaih msir sang dôk hlăm yang ƀuôn, đru kơ mnuih hdĭp hlăm klei dleh dlan lehanăn mnuih mă bruă. 3 hdră ala čar kñăm dưi djăp ênoh čuăn hlăm bruă mkra êlan klông pưk sang krĭng ƀuôn sang taih kbưi.

Tui si Nguyễn Khắc Toàn, Khua knơ̆ng bruă sang čư̆ êa čar Khánh Hòa, mbĭt hŏng jih jang bruă jăk mâo ngă leh, alŭ wăl ăt adôk lu mơh klei dleh dlan gun kpăk. Hlăm anăn, bruă bi liê ngăn prăk knŭk kna knŏng mrâo djăp êbeh  44%, kyua dleh dlan hlăm klei ruh mgaih anôk ala, lehanăn mkŏ bruă čuăl mkă leh klei bi mŭt mbĭt bruă sang čư̆ êa. Anei jing čar mđing ruh mgaih:

“Hmei mđing dôk ruh mgaih jih jang klei dleh dlan hlăm dŭm mta bruă dôk ngă, hmei mâo jao leh kơ phung khua kiă kriê đru bi klam hlăm dŭm mta bruă mjêč, ktrŏ. Mkŏ mjing nanao klei mtrŭt mjhar, ruh mgaih bi leh djăp mta bruă kpăk ktrŏ hlăm wưng tinăp. Čăng hmăng hŏng dŭm klei anăn, mâo klei bi gĭr jih hnơ̆ng mghaih msir klei dleh dlan, rơ̆ng mâo klei lŏ đĭ kyar hĭn.”

Khua phŭn bruă Nguyễn Hải Ninh bi mni kơ jih jang klei thâo gĭr mơ̆ng čar  Khánh Hòa hlăm bruă gĭt gai lehanăn kiă kriê bruă duh mkra, mđĭ hĭn bruă bi mlih mrô hlăm klei ngă hră mơar, lehanăn ba yua KPI hlăm bruă kiă kriê knuă druh.

Nguyễn Hải Ninh bi mklă leh klei bi mŭt mbĭt, Khánh Hòa mâo anôk pioh kơ bruă mđĭ kyar jing prŏng hĭn, hŏng klei găl lehanăn ai dưi jing ƀiă snăk alŭ wăl mkăn dưi mâo msĕ, msĕ si hang ksĭ jing dlông hĭn hlăm kluôm ala, êlan klông jăk siam, tač êdeh phiơr, anôk bruă pui kmlă, lehanăn bruă hiu čhưn ênguê ti hnơ̆ng gưl ala čar sơăi. Kyuanăn, Khánh Hòa bi ruh mgaih hŏng klei pral djăp mrta klei gun kpăk, kñăm bi leh bruă čuăn klei đĭ kyar truh 8,1% hlăm kluôm thŭn 2025,  lehanăn hlue ngă tŭ jing êjai dŭm mta mtrŭn kơ klei bhiăn, hdră êlan pioh hjăn kơ alŭ wăl, mjing knơ̆ng kơ klei mđĭ kyar hlăm jih wưng. Khua phŭn bruă Nguyễn Hải Ninh lač:

          “Mâo leh phung duh bi liê prŏng truh hŏng čar Khánh Hòa. Ƀiădah lŏ bi ksiêm dlăng hĕ kơ jih jang bruă dôk ngă hlăm alŭ wăl ƀuôn prŏng, alŭ wăl êngao kơ bruă rĭng jia si wĕ? Ya hdră êlan čiăng bi djŏ? Si jing alŭ wăl duh mkra mnia mblei êngiê? Tăp hnơ̆ng kơ klei bluh đĭ? Tơdah hơăi snăn phung duh mkra srăng mă bruă djŏ tui si hdră êlan aguah tlam, dleh mâo klei đĭ kyar, klei tă êlan mơ̆ng čar brei bi djŏ hŏng hdră êlan kluôm ala.”

Hŏng klei găl, klei dưi mâo leh snăn klei trŭn kơ bruă hŏng jih ai tiê, hlăm jih bruă kđi čar, čar Khánh Hòa hlăk dôk ti anăp klei bluh đĭ prŏng, srăng jing anôk phŭn kơ klei duh mkra wăl êa ksĭ, bruă hiu čhưn ênguê, lehanăn klei duh mkra mnia mblei ênuk mrâo kơ kluôm alŭ wăl dhŭng kwar krah. Jih jang klei ƀuăn leh đru ruh mgaih jih klei dleh dlan mơ̆ng dŭm phŭn dhar bruă, gưl dlông, sĭt nik klei čang hmăng kơ Khánh Hòa dưi bi sĭt klei đĭ kyar truh ti ênoh kčah 8,1% hlăm thŭn   2025.