VOV4.Êđê - Tlam mbruê 20/5, hlăm klei kƀĭn thơ̆ng kơ bruă, êpul gơ̆ng bruă ƀuôn sang čar Khánh Hoà gưl 7 bi klă leh hdră mtrŭn kơ klei ƀuăn rơ̆ng mkăp brei ngăn prăk duh bi liê bruă knŭk kna wưng thŭn 2021 -2025, mơ̆ng ngăn prăk alŭ wăl čiăng bi mguôp mkŏ mkra êlan dơ̆ng pral Khánh Hòa – Ƀuôn Ama Thuôt, mĭn tĭng giăm 350 êklai prăk, rơ̆ng ƀiă hĭn 50% ênoh prăk čiu kơ mnuih ƀuôn sang, ruh mgaih anôk ala kdrêč êlan găn ti čar Khánh Hoà. Ênoh prăk mkăp brei srăng klă klơ̆ng hluê ngă hluê si hră mơar ksiêm duah mâo klei găl mâo leh dŭm gưl bruă bi klă. Hdră mkăp êlan dơ̆ng pral Khánh Hòa – Ƀuôn Ama Thuôt jing sa hlăm dŭm hdră mkăp yuôm bhăn mơ̆ng ala čar mâo knŭk kna ba mdah hŏng bruă kƀĭn ala bi klă duh bi liê hluê hdră knŭk kna. Kluôm boh taih êlan anei hlăm brô 117 km hŏng 4 grông êlan êdeh leh anăn mĭn tĭng srăng kčưm ngă ti thŭn 2023, bi leh ti thŭn 2025.

Y-Ƀel pô mblang