Dŭm hruê giăm knhal jih thŭn, hlăk êjai tue ala tač êngao msĕ si Russia, Dhŭng Korea, China … lŏ hriê lu, klei hiu čhưn ênguê lŏ dơ̆ng bi mklă bruă klam sa hlăm pă bruă phŭn hlăm bruă duh mkra čar Khánh Hòa. Hrô kơ pŏk mlar hŏng ênoh,  bruă hiu čhưn ênguê dôk bi mlih jing hru hmô hnơ̆ng jăk, mđing mđĭ kyar mtah leh anăn kjăp. Khua Êpul hgŭm hiu čhưn ênguê Khánh Hòa, Phạm Minh Nhựt lač brei bi mlih ară anei jing amâo dưi êmưt ôh:

“Hiu čhưn ênguê mtah, hơĭt kjăp amâo djŏ jing sa hdră bruă bhiâo ôh, ƀiădah jing hdră msir sa anăn mơ̆ng phung ngă bruă hiu čhưn ênguê ară anei. Hlăk êjai dôk guôn klei đru mơ̆ng dŭm anôk bruă kriê dlăng knŭk kna snăn brei drei ngă mtam mơ̆ng ară anei čiăng mđĭ kyar hiu čhưn ênguê kjăp. Tue hiu čhưn ară anei ƀrư̆ mđing kơ klei mđĭ kyar mtha, răng ,mgang wăl hdĭp mda, tơdah drei bi mlih srăng iêô jak hnơ̆ng tue hiu čhưn anei.

Hlăm wăl duh mkra Vân Phong - krĭng boh kdrŭt ala čar hlue si Klei čuăl mkă kluôm ala čar - Khánh Hòa dôk iêô jak phung bi liê mđing kơ gru hmô wăl tuh tia mkra mjing mtah, djŏ guôp hŏng hdră tă “Bi mklă gru hmô đĭ kyar mrâo, lŏ mkra mjing bruă duh mkra” hlăm hră čih Hưn mdah kđi čar. Nai prĭn Phạm Hồng Điệp, Khua Êpul gơ̆ng kriê dlăng Knơ̆ng bruă Shinec, anôk bruă mđĭ kyar bruă tuh tia mkra mjing ti Hải Phòng leh anăn ară anei ksiêm dlăng bi liê hlăm Khánh Hòa lač klei blŭ:

“Hlăm 3 - 4 wăl tuh tia mkra mjing kơ sa wăl kơ klei lŏ mkra  mjing mơ̆ng mta djah bruă tuh tia mkra mjing. Kyua tơdah kƀah hdră anei, dŭm klei hmăi kơ Wăl hdĭp mda  srăng jing klei bi kgăn prŏng kơ hdră mđĭ kyar mtah. Knŭk kna ară anei ăt dôk mtrŭt mjhar gru hmô tuh tia mkra mjing mnơ̆ng djah mkra mjing, bruă duh mkra kluuôm”.

       Khánh Hòa dôk iêô jak dŭm hdră bruă nah gŭ kluôm hlăm bruă kdrŭn ksĭ - logistics, wăl tuh tia mkra mjing mtah, kdrăp mrâo leh anăn hiu čhưn ênguê hnơ̆ng jăk ti Wăl tuh tia mkra mjing Vân Phong, Cam Ranh leh anăn krĭng riêng gah hlăm boh kdrŭt mđĭ kyar Dhŭng kwar Krah.  Hrăm mbĭt hŏng klei iêô jak bi liê, čar mđĭ  mkra mlih hră mơar, ba yua klei bhiăn “sa boh ƀăng - sa anôk phŭn”, yua mrô hlăm hdră leh anăn hưn mdah hdră msir mgaih. Kyua bi mklă bruă klam grăp knơ̆ng, dhar bruă, wưng msir lu hră mơar bi liê - lăn ala - rŭ mdơ̆ng hrŏ 30-40%; hră mơar mlir dhar bruă lu anôk bruă dưi bi hrŏ mơ̆ng dŭm mlan adôk dŭm hruê kăm. Trần Minh Chiến, Khua Anôk bruă kriê dlăng wăl duh mkra - leh anăn dŭm wăl tuh tia mkra mjing čar Khánh Hòa brei thâo, klei kñăm jing mkŏ mjing sa hdră djŏ leh anăn klă  mngač, djŏ guôp hŏng hdră tă mlih mrâo gru hnô đĭ kyar. Anôk bruă kriê dlăng ngă anôk mkŏ đru kơ  phung bi liê mơ̆ng bruă kriê dlăng, ngă hră mơar, mỏăp kơ hdră kčah truh kơ msir mgaih anôk ala leh anăn mkŏ dŭm knơ̆ng, dhar bruă čiăng kơ hdră bruă dưi pŏk ngă găl ênưih hĭn.

“Čiăng dưi iêô jak phung bi liê, hmei bi mlih klei mĭn kriê dlăng jing klei mĭn hrăm mbĭt, hrăm mbĭt bi liê msir mgaih klei gun kpăk. Hmei srăng jing pô kčĕ thơ̆ng kơ bruă bi liê, đru kơ pô bi liê djăp klei hâo hưn, mkŏ anôk bruă kriê dlăng knŭk kna čiăng kơ pô duh bi liê găl ênưih hĭn pŏk ngă hdră bruă”

 Lu hdră bruă mâo Khánh Hòa iêô mthưr hlăm wưng 2025 - 2030, kƀĭn hlăm anôk bruă logistics, kdrŭn ksĭ dŭ mdiăng mnơ̆ng lu ala čar, wăl tuh tia mkra mjing mtah - kdrăp mrâo, wăl mnia blei êngiê. Anei jing klei kñăm djŏ hŏng hdră tă mđĭ kyar “dŭm anôk bruă ngăn prăk lu ala čar, wăl mnia blei êngiê ênuk mrâo” leh anăn “wăl duh mkra êa ksĭ lu mta” mâo lač hlăm Hră čih Hưn mdah kđi čar. Mbĭt hŏng bruă pŏk mlar klei găl, čar kčah klei  čiăng duah phung bi liê mơ̆ng akŏ thŭn mtam kñăm ñĕ kơ hdră bruă lui sui, êmưt hnơ̆ng bi leh amâodah kƀah klei thâo. Khua dlăng bruă đảng čar Khánh Hòa Nghiêm Xuân Thành mñă klă:

“Dŭm anôk bruă mâo klei thâo brei ƀuăn rơ̆ng. Tơdah amâo mâo klei thâo ôh ƀiădah ăt brei ngă, amâo ksiêm dlăng êlâo ôh, guôn leh kơh ksiêm dlăng, srăng ba lu klei amâo jăk. Kyua anăn, brei ngă bi jăk mơ̆ng êlâo truh kơ êdei leh anăn ksiêm ruah mơ̆ng êlâo. Ksiêm ruah mơ̆ng êlâo jing yuôm bhăn snăk. Hdră anei amâo dưi ba klei ktrŏ ôh kơ ngăn prăk, ƀiădah mơ̆ng hnơ̆ng čuăn yua AI, hdră ksiêm dlăng klă klơ̆ng, đru bi hrŏ wưng hlue ngă hdră bruă”.

Dlăng kluôm, mơ̆ng hiu čhưn ênguê mtah truh kơ bruă tuh tia mkra mjing kluôm, mơ̆ng klei mkra mlih hră mơar truh kơ mlih mrâo gru hmô đĭ kyar, Khánh Hòa dôk hlue ngă ai tiê mơ̆ng Hră čih hưn mdah kđi čar Klei bi kƀĭn XIV - đĭ kyar pral, hơĭt kjăp leh anăn mơ̆ng boh kdrŭt mrâo. Tơdah klei mĭn ngă bruă dưi dưm mrô sa, tơdah phung bi liê dưi ruah klă mngač leh anăn tơdah klei đĭ kyar nao mbĭt hŏng bruă răng mgang wăl hdĭp mda, Khánh Hòa mâo djăp tur knơ̆ng mŭt hlăm wưng đĭ kyar dua ênoh mrô, jing anôk đĭ kyar mrâo ti ktuê hang ksĭ Dhŭng kwar Krah leh anăn kluôm ala.