Truh kơ ară anei, čar Khánh Hoà dưi bi leh bruă mprăp kơ klei ruah phung bi ala Bruă Kbĭn ala gưl 16 leh anăn ruah phung bi ala Êpul gơ̆ng bruă ƀuôn sang dŭm gưl. 65 să, ƀuôn hgŭm, anôk bruă knơ̆ng bi klă 1.123 anôk mplĕ hră, knar hŏng 1.123 êpul ruah khua. Anei jing êpul klă anăp ngă bruă mơ̆ng bi klă hdră anăn phung mplĕ hră, mprăp djăp mnơ̆ng yua truh kơ ngă klei mplĕ hră, yap hră mplĕ, rơ̆ng kơ klei mplĕ hră mkŏ mjing djŏ hdră bhiăn. Hluê si hdră mtrŭn mơ̆ng êpul gơ̆ng ruah khua ala čar, Khánh Hoà dưi ruah 12 čô bi ala Bruă Kbĭn ala gưl 16, hŏng 20 mgơ̆ng ruah ti 4 anôk ruah khua. Bi hŏng Êpul gơ̆ng bruă ƀuôn sang čar wưng thŭn 2026 - 2031, mâo 108 čô mgơ̆ng asei čiăng ruah 67 čô. Ti gưl să, kluôm čar ruah 1.392 čô bi ala. Truh kơ ară anei, dŭm alŭ wăl ngă leh klei bi kƀĭn trông tal 3, rơ̆ng kơ hŏng klei čuăn.

Mbĭt hŏng bi leh hdră kƀĭn trông, bruă čih mkra leh anăn bi klă hră anăn phung mplĕ hră ăt dưi ngă hrăm mbĭt, klă mngač. Ti dă Xuân Hải, hră anăn phung mplĕ hră dưi bi klă ti 17 anôk mplĕ hră. Bruă sang čư̆ êa alŭ wăl lŏ dơ̆ng ksiêm dlăng, bi mrâo klei hưn, mbĭt anăn čŏng thâo klă boh sĭt, hmao msir dŭm boh klei mâo, rơ̆ng kơ klei tŭ mơ̆ng phung mplĕ hră. Nguyễn Trúc Hòa, khua Bruă sang čư̆ êa să Xuân Hải, čar Khánh Hòa brei thâo:

 “Să dôk mprăp ba mdah hră anăn phung mgơ̆ng asei ti jih jang anôk mplĕ hră. Hlăm wưng kơ anăp, Bruă sang čư̆ êa să lŏ dơ̆ng gĭt gai, thâo klă boh sĭt phung mplĕ hră leh anăn mnuih ƀuôn sang, hmao msir dŭm mta phŭn djŏ tuôm kơ klei kčŭt hưn tơdah mâo, mbĭt anăn mđĭ hĭn bruă răng mgang klei êđăp ênang êlâo, hlăm leh anăn êdei hruê mplĕ hră”.

Amâo djŏ knŏng ti ƀuôn prŏng, ti dŭm alŭ wăl ktuê hang ksĭ, anôk mâo lu phung mă kan hdang kreh nao ti êa ksĭ sui hruê, bruă ksiêm dlăng phung mplĕ hră ăt dưi ngă klă hĭn. Dŭm alŭ bi mguôp hŏng kahan ksiêm alŭ wăl nao ti grăp boh sang bi klă klei hưn, thâo phung nao ti êa ksĭ, truh ti hang mơ̆ng anăn mâo hdră êlan mtrŭt mjhar djŏ guôp, rơ̆ng amâo mâo lui phung mplĕ hră. Ti alŭ Thành Đạt, ƀuôn hgŭm Nam Nha Trang, anôk mâo êbeh 1.600 čô mplĕ hră, hlăm anăn mâo êbeh 200 čô mă kahan hdang, klei ksiêm dlăng dưi ngă jêñ jêñ, klă hŏng boh sĭt ƀuôn sang. Nguyễn Thị Hoa, khua alŭ brei thâo:

 “Pô dlăng kơ boh sĭt mnuih ƀuôn sang alŭ wăl. Hmei nao ksiêm truh kơ grăp sang. Bi mnguôp hŏng kahan ksiêm alŭ wăl ksiêm dlăng klei čih hưn. Mnuih ƀuôn sang nao êa ksĭ mơ̆ng sa hruê kăm truh sa mlan, gŏ sang brei hră anăn phung mplĕ hră. Hmei dlăng kơ boh sĭt alŭ wăl čiăng mtrŭt mjhar phung mplĕ hră nao ruah khua”.

Nao mbĭt hŏng bruă ksiêm dlăng hră anăn phung mplĕ hră, bruă hâo hưn dưi ngă kluôm dhuôm, đru mđĭ klei thâo săng leh anăn bruă klam mnuih ƀuôn sang. Bruă mđung asăp nah gŭ, dŭm êpul bruă ti nah gu ngă bruă hâo hưn jêñ jêñ, đru kơ phung mplĕ hră thâo klă hruê mmông, anôk mplĕ hră, ăt msĕ mơh hdră ngă bruă mơ̆ng phung mgơ̆ng asei. Mơ̆ng hruê 26/2 - 14/3, dŭm anôk bruă, alŭ wăl mkŏ mjing klei kƀĭn bi tuôm hŏng phung bi ala, mkŏ mjing klei găl kơ phung mgơ̆ng asei ngă klei mtrŭt mjhar mplĕ hră hluê si klei čuăn, mbĭt đru kơ phung mplĕ hră thâo klă hĭn kơ pô mgơ̆ng asei ti anăp klei dưi ruah. Võ Chí Cường, khua knơ̆ng bruă kiă kriê bruă knuă čar Khánh Hoà brei thâo:

 “Hâo hưn mơ̆ng ară anei truh kơ hruê mplĕ hră, mđung asăp mơ̆ng să mđung nanao grăp hruê dŭm mta phŭn kơ klei mplĕ hră čiăng kơ mnuih ƀuôn sang hdơr kơ klei ruah khua, hdơr hruê 15/3 nao ruah khua. Leh hưn mdah hră anăn pô mgơ̆ng asei, srăng dlăng kơ anăn phung mgơ̆ng asei”.

Hŏng klei ksiêm dlăng bruă mprăp ti nah gŭ, khua gĭt gai čar Khánh Hoà mñă kơ dŭm alŭ wăl lŏ dơ̆ng nao klă hŏng boh sĭt, čŏng thâo klă klei čiăng, klei hmăng hmưi phung mplĕ hră, mbĭt anăn mđĭ klei hâo hưn, mkŏ mjing klei sa ai leh anăn bi tŭ ư hlăm mnuih ƀuôn sang, đru mkŏ mjing tŭ dưn klei mplĕ hră Trần Phong, khua Bruă sang čư̆ êa čar Khánh Hoà mñă ktang.

 “Hŏng klei mplĕ hră hâo hưn mâo bruă klam yuôm bhăn, čiăng kơ mnuih ƀuôn sang thâo săng kơ boh tŭ dưn klei mplĕ hră, brei kơ mnuih ƀuôn sang thâo kơ bruă klam, klei dưi mơ̆ng phung mplĕ hră. Hluê anăn, đru kơ mnuih ƀuôn sang thâo săng, čŏng pô sa nao, nao mplĕ hră”.

Hŏng klei mprăp hrăm mbĭt, kjăp, Khánh Hoà dôk bi leh dŭm bruă hluê si hdră kčah, rơ̆ng kơ grăp čô mplĕ hră dưi nao mplĕ hră, đru hlăm klei tŭ jing mơ̆ng hruê knăm ruah khua leh anăn mkŏ mjing bruă Knŭk kna kjăp ktang.