Anei jing klei hưn mâo bi êdah ti anôk bi kƀĭn phung hâo mdah gưl dlông mlan 6/2023, mâo anôk bruă kiă kriê klei hâo hưn gưl dlông mkŏ mjing aguah mbrue 16/6. Ti anôk bi kƀĭn, hưn pral kơ klei rŭng răng ti čar Daklak, Thiếu tướng Đặng Hồng Đức, Khua adŭ bruă phŭn bruă kahan ksiêm lač, leh mâo klei rŭng răng anăn, Phŭn bruă kahan ksiêm pral tiŏ nao mtam êpul djŏ tuôm, wang dar alŭ wăl mâo klei rŭng răng, răng mgang dŭm boh bruă sang čư̆ êa, răng mgang kjăp klei êđăp ênang kơ jih jang mnuih ƀuôn sang lehanăn tiŏ mă phung ngă soh. Mbĭt hŏng anăn, pral mâo mtam dŭm hdră đru kơ phung djiê êngiă, phung êka, čua êmuh mđĭ ai gŏ sang knuă druh, mnuih ƀuôn sang mâo klei truh. Thiếu tướng Đặng Hồng Đức lač, hŏng ai tiê jhŏng kmlăn tui tiŏ phung ngă soh truh ară anei êbeh 50 nao hlăm klei bi rŭng anei. Leh ksiêm êmuh tal êlâo ƀuh mâo lu snăk phung adôk hđeh nao hlăm klei anei, kyua amâo mâo thâo săng ênưih lĕ hlăm klei arăng mplư, mčŭt mčhur mơ̆ng hla pŏk yang ƀuôn, ngă klei bi kah ana mbha djuê plah wah mnuih djuê lar lehanăn mnuih djuê ƀiă... Kbiă hriê mơ̆ng mnêč jhat mơ̆ng phung bi roh, phung Fulro ti ala tač êngao mčhur mnuih djuê ƀiă ngă klei bi kah hŏng mnuih djuê lar, ngă klei bi rŭng, mjing klei hing ang amâo mâo djŏ lačdah mâo nao đuĕ kơ ala tač êngao. Klei anei hlăk mâo kahan ksiêm dôk bi mngač.

  Kơ hdră tinăp, Thiếu tướng Đặng Hồng Đức mñă, Phŭn bruă kahan ksiêm srăng lŏ tui tiŏ mă jih phung ngă klei bi rŭng. Lehanăn răng kriê bi kjăp klei êđăp ênang kơ mnuih ƀuôn sang, lehanăn kơ phung ngă bruă hiu tiŏ mă phung ngă soh, hlăm bruă dôk ksiêm, mghaih msir boh klei bi djŏ hŏng klei bhiăn. Phŭn bruă kahan ksiêm mtă leh kơ dŭm gưl bruă Đảng, bruă sang čư̆ êa čar Daklak, dŭm čar ti Lăn Dap Kngư lehanăn krĭng riêng gah ngă nanao bi jăk bruă đru čung ba mnuih ƀuôn sang, păn kjăp ai tiê  mnuih ƀuôn sang, jĕ giăm hŏng mnuih ƀuôn sang pral thâo ƀuh ya mta jing klei amâo mâo djŏ hlăm mnuih ƀuôn sang čiăng mâo hdră mghaih msir mtam mơ̆ng hnưm, mơ̆ng phŭn mtam, lehanăn mđĭ klei thâo răng hlăm mnuih ƀuôn sang, ti anăp mnêč jhat mơ̆ng phung bi roh duah êlan bi rai, bi kah ana mbha djuê, mđĭ hĭn klei jih jang mnuih ƀuôn sang thâo răng mgang klei êđăp ênang lăn čar./.