VOV4.Êđê- Tlam hruê 20/3, ti ƀuôn prŏng Hồ Chí Minh, Khua anôk bruă kƀĭn ala Vương Đình Huệ mă leh bruă hŏng Anôk kiă kriê bruă Đảng ƀuôn prŏng Hồ Chí Minh kơ boh tŭ hdră kiă kriê, gĭt gai lehanăn hluê ngă Hdră kčah mđĭ kyar bruă duh mkra – ala ƀuôn ti ƀuôn prŏng Hồ Chí Minh thŭn 2021, bruă klam phŭn hlămthŭn 2022; boh tŭ pŏk ngă Hdră mtrŭn mrô 54 mơ̆ng Anôk bruă kƀĭn ala kơ bruă ba yua klei bhiăn, hdră mtrŭn mđĭ kyar ƀuôn prŏng Hồ Chí Minh.

Kơ hdră êlan, bruă klam hlăm wưng ti anăp, Khua anôk bruă kƀĭn ala Vương Đình Huệ mtă kơ phung khua kiă kriê ƀuôn prŏng Hồ Chí Minh brei mđĭ hdră mkŏ mkra, ƀư̆ mkra Đảng lehanăn anôk bruă kđi čar doh mngač, kjăp ktang, mkŏ mkra anôk bruă hgŭm mguôp, sa ai. Mđing kơ bruă čih mkra klei bhiăn hluê djŏ Hdră mtrŭn Klei bi kƀĭn tal XIII mơ̆ng Đảng lehanăn Hdră mtrŭn Klei bi kƀĭn bruă Đảng ƀuôn prŏng tal XI, ksiêm dlăng hdră ngă bruă, hnưm mâo hdră kčah mđĭ kyar bruă duh mkra – ala ƀuôn, dŭm mta kñăm, bruă klam čiăng mkra mlih, thiăm mbŏ kñăm rơ̆ng klei djŏ guôp, ba wĭt klei tŭ dưn./.

                                                    Pô mblang: H’Nêč Êñuôl