VOV4.Êđê - Lŏ dơ̆ng hdră nao mă bruă ti dŭm čar kwar Dhŭng lehanăn Dap mnai êa krông Cửu Long, aguah hruê 25/1, Khua anôk bruă kƀĭn ala Vương Đình Huệ mbĭt hŏng êpul mă bruă nao čhưn, h’êč hmưi Têt phung knuă druh, kahan ksiêm lehanăn êpul bruă mdrao mgŭn ba anăp hlăm hdră gang mkhư̆ klei ruă tưp ti alŭ wăl čar Cà Mau. Khua anôk bruă kƀĭn ala Vương Đình Huệ mñă, Cà Mau jing anôk yuôm bhăn mơ̆ng hdră duh mkra, bruă lĭng kahan – răng mgang klei êđăp ênang, krĭng lăn myang mơ̆ng ala čar. Jing alŭ wăl phŭn, kyua anăn êpul kahan ksiêm čar Cà Mau brei gĭr ktưn hĭn hlăm klei mă bruă. Kñăm lač jăk kơ êpul ba anăp nao hlăm hdră gang mkhư̆ klei ruă Covid 19, bi ala kơ phung khua kiă kriê Đảng, Knŭk kna, Khua anôk bruă kƀĭn ala Vương Đình Huệ mđup brei leh mnơ̆ng lehanăn h’êč hmưi kơ phung knuă druh, lĭng kahan, kahan ksiêm yang ƀuôn lehanăn phung nai aê mdrao mơ̆ng čar Cà Mau mbĭt hŏng gŏ sang mâo sa yan Têt mrâo, djŏ hŏng klei bhiăn “Têt kuh kŭm ênŭm ênap – Yan mnga h’ĭt ênang”./.

H’Nêč pô mblang