VOV4.Êđê- Hlăm hdră nao čhưn ti Lao, tlam hruê 17/5, Khua anôk bruă kƀĭn ala Vương Đình Huệ mbĭt hŏng Êpul bi ala gưl dlông anôk bruă kƀĭn ala ala čar drei nao čhưn leh ti Sang hră čiêm rông hđeh mnuih djuê ƀiă čar Champasak. Sang hră anei jing sa hlăm dŭm boh sang hră mâo Knŭk kna lehanăn mnuih ƀuôn sang Việt Nam mkra jao brei kơ knŭk kna lehanăn mnuih ƀuôn sang Lao. Sang hră anei mkŏ mjing mơ̆ng thŭn 1999, truh ară anei, sang hră đru mguôp mjuăt bi hriăm kơ anak aneh mnuih djuê ana Lao mơ̆ng 4 čar krĭng Dhŭng Lao.

 Sang hră mâo leh dŭm boh tŭ hlăm bruă mtô bi hriăm. Boh nik mđing bi hriăm klei Yuăn. Sang hră čiêm rông hđeh mnuih djuê ƀiă čar Champasak ară anei mâo 900 čô hđeh, 14 djuê ana. Khua anôk bruă kƀĭn ala Vương Đình Huệ brei thâo, dua Đảng, dua knŭk kna mđing lu kơ bruă mtô bi hriăm čiăng mđĭ klei thâo mnuih mă bruă hlăm wưng mrâo. Kơ klei akâo čiăng mơ̆ng sang hră hlăm bruă mđĭ prăk đru hriăm hră, lŏ dơ̆ng đru, mkra mđĭ, mlih mrâo kdrăp mtô bi hriăm kơ sang hră. Khua anôk bruă kƀĭn ala Vương Đình Huệ čih yap lehanăn jao kơ Anôk bruă bi ala Việt Nam ti Lao mbĭt hŏng anôk bruă bi hgŭm mlir knŭk kna ksiêm dlăng čiăng msir mghaih ƀrư̆ ƀrư̆. Ƀri gưl anei, Khua bruă kƀĭn ala Vương Đình Huệ mđup brei leh mnơ̆ng kơ phung hđeh thâo raih klei Yuăn, mâo hdruôm hră, kdrăp mnơ̆ng yua mâo ênoh jih jang 320 êklăk prăk./.

Pô mblang: H’Nêč Êñuôl