Khua Anôk bruă kƀĭn ala Vương Đình Huệ nao lehanăn blŭ hrăm ti Knăm mtrŭt mjhar, Khua anôk bruă kƀĭn ala lač, mlan êdam êra grăp thŭn jing hdră bruă tŭ yuôm, kčưm mơ̆ng ákŏ yan mnga, jing yan phung êdam êra, jing dŭm hdră mĭn mrâo kbiă hriê mơ̆ng boh sĭt hdră êdam êra lehanăn hdră mă bruă Đoàn. Khua anôk bruă kƀĭn ala bi mni kơ Êpul bruă Đoàn êdam êra Cộng sản Hồ Chí Minh ruah leh mta phŭn hdră mă bruă hlăm thŭn 2024 jing “Thŭn êdam êra ba anăp”, bi mklă mta phŭn Mlan êdam êra thŭn anei jing “Phung êdam êra ba anăp kyua klei hdĭp êpul êya”, bi mguôp Knăm mtrŭt mjhar mlan êdam êra lehanăn Têt pla kyâo hdơr knga kơ Awa Hô hlăm sa wưng, bi êdah ai tiê ngă bruă, klei gĭr mơ̆ng dŭm gưl phŭn, dhar bruă, bruă Đoàn.

Mđing truh kơ Têt pla kyâo hdơr nanao kơ Awa Hô, Khua anôk bruă kƀĭn ala mtă kơ dŭm êpul bruă Đoàn lehanăn phung êdam êra kluôm ala krơ̆ng kjăp boh tŭ dưn dŭm gru hmô, hdră ngă bruă jăk, pla dliê, răng mgang wăl hdĭp mda, mdrơ̆ng hŏng klei bi mlih yan adiê, kriê kjăp klei mtah – doh – siam wăl anôk hdĭp. Ăt hlăm hdră mlan êdam êra, Khua anôk bruă kƀĭn ala nao leh ti Knăm mphŭn ba yua Sang dlăng hră mtah, wăl anôk dlăng hră kơ phung hđeh ti să Nam Thanh, kdriêk Nam Đàn lehanăn nao čuh brui mngưi ti Wăl knhuah gru Kim Liên, Wăl knhuah gru hƀuê ênuk ala čar Truông Bồn.