VOV4.Êđê- Hlăm hdră nao čhưn ti Lao, aguah hruê 17/5, ti ƀuôn prŏng phŭn Viêng-chăn, Khua anôk bruă kƀĭn ala Vương Đình Huệ bi tuôm leh hŏng Khua knŭk kna Lao Phankham Viphavanh. Ti anôk bi tuôm, dua khua kiă kriê bi êdah klei ư ai kơ hdră mđĭ kyar klei bi mjĕ hgŭm bruă plah wah dua ala čar wưng êgao, tĭng dlăng myuôm bruă dua tĭng krơ̆ng kjăp klei bi trông hluê êpul lehanăn bi tuôm gưl dlông.

Khua anôk bruă kƀĭn ala Vương Đình Huệ mñă klă, anôk bruă kƀĭn ala Việt Nam bi mni kơ hdră mkŏ mkra lehanăn bi leh klei bhiăn djŏ hŏng klei čiăng mlih mrâo lehanăn ñŭ kma hŏng tar rŏng lăn, sa ai lehanăn mđĭ bruă ksiêm dlăng, mtrŭt mđĭ bruă hluê ngă dŭm hdră bruă, hdră bi hgŭm plah wah knŭk kna Việt Nam lehanăn Lao. Kơ hdră mđĭ hĭn klei bi hgŭm dua nah hlăm wưng ti anăp, dua khua kiă kriê mñă klă bruă dua tĭng brei mđĭ hdră pŏk ngă dŭm klei kuôl kă gưl dlông. Dua tĭng brei mđĭ hĭn klei gĭr tui duah hdră msir kñăm mđĭ klei bi hgŭm bruă duh mkra klă sĭt hlăm klei bi mjĕ dua ala čar, năng djŏ hŏng klei bi mjĕ Việt-Lào.

Pô mblang: H’Nêč Êñuôl