VOV4.Êđê- Ti sang bruă kƀĭn ala, Khua anôk bruă kƀĭn ala Vương Đình Huệ bi tuôm hŏng phung bi ala mniê Anôk bruă kƀĭn ala thơ̆ng kơ bruă ti gưl dlông lehanăn phung mniê kiă kriê hlăm Adŭ bruă kƀĭn ala ƀri hruê phung mniê tar rŏng lăn, hruê 8/3. Khua bruă kƀĭn ala Vương Đình Huệ bi mni kơ dŭm klei gĭr amâo mdei mơ̆ng phung bi ala Anôk bruă kƀĭn ala, hlăm anăn mâo phung mniê mă thơ̆ng kơ bruă anei mơ̆ng wưng păn bruă Anôk bruă kƀĭn ala gưl XV. Hŏng anôk bruă kƀĭn ala, hlăm wưng êgao, Anôk bruă kƀĭn ala Việt Nam mâo ênoh phung bi ala mniê lu êdi hlăm krĭng lehanăn tar rŏng lăn; hnơ̆ng tŭ lehanăn bruă klam mơ̆ng phung mniê bi ala ƀrŭ hruê dưi mkra mđĭ. Ti anăp klei čiăng mơ̆ng ala čar hlăm wưng đĭ kyar mrâo, Khua bruă kƀĭn ala Vương Đình Huệ mtă: Phung bi ala mniê Anôk bruă kƀĭn ala thơ̆ng kơ bruă ti gưl dlông lehanăn phung mniê kiă kriê hlăm Adŭ bruă kƀĭn ala lŏ dơ̆ng tui ksiêm hriăm, mđĭ klei thâo, đru mguôp ba wĭt klei tŭ dưn hlăm hdră mă bruă mơ̆ng Anôk bruă kƀĭn ala, nao hgŭm tŭ dưn hlăm bruă tă hdră êlan rơ̆ng klei tŭ dưi kơ phung mniê lehanăn hđeh mniê, hluê ngă klei mtăp mđơr, bi leh jăk bruă klam Pô bi ala kơ mnuih ƀuôn sang, djŏ hŏng klei khăp čiăng, đăo knang mơ̆ng mnuih ƀuôn sang kluôm ala./.

 Pô mblang: H’Nêč Êñuôl