VOV4.Êđê - Hruê 15/5 mbruê, Khua anôk bruă kƀĭn ala Vương Đình Huệ lehanăn êpul bi ala gưl dlông mơ̆ng anôk bruă kƀĭn ala ala čar drei truh leh ti tač êdeh phiơr Wattay, ƀuôn prŏng phŭn Vientian, ala čar Lao mphŭn nao čhưn kơ ala čar Lao.

Gưl nao čhưn mơ̆ng Khua anôk bruă kƀĭn ala Vương Đình Huệ mâo phung ƀĭng găp Lao dlăng anei jing sa hlăm dŭm hdră bruă yuôm bhăn hĭn hlăm thŭn Bi hgŭm mguôp mjĕ mjuk Việt Nam – Lao, Lao – Việt Nam thŭn 2022; mtrŭt mđĭ hĭn klei bi mjĕ ƀĭng hgŭm hŏng Việt Nam čiăng đru mguôp hluê ngă tŭ jing Hdră kčah mđĭ kyar bruă duh mkra – ala ƀuôn 5 thŭn tal IX mơ̆ng Lao, mđĭ klei bi hgŭm, bi đru hdơ̆ng găp hlăm hdră mdrơ̆ng hŏng klei ruă tưp; lŏ krŭ wĭt, mđĭ kyar bruă duh mkra – ala ƀuôn êdei kơ klei ruă tưp, tui ksiêm kơ hdră mă bruă mơ̆ng anôk bruă kƀĭn ala Việt Nam. Leh nao ti Lao, Khua anôk bruă kƀĭn ala Vương Đình Huệ srăng nao ti Knăm mphŭn pŏk hdră bruă Wăl tač mnga mjĕ mjuk Lao - Việt Nam; bi tuôm hŏng êpul êya bruă duh mkra Việt Nam duh bi liê ti Lao, nao čhưn Anôk bruă bi ala lehanăn bi tuôm hŏng êpul êya mnuih Việt Nam ti Lao./.

H’Nêč pô mblang