VOV4.Êđê - Tlam 22/4, Marc Knapper, Khua bi ala Mi mrâo ti Việt Nam hriê kkuh čhưn leh anăn mă bruă hŏng khua gĭt gai ƀuôn prŏng Đà Nẵng. Khua bi ala Marc Knapper bi mni kơ anôk duh bi liê mơ̆ng Đà Nẵng. Marc Knapper brei thâo mkŏ mjing leh Anôk bruă Đà Nẵng Êpul hgŭm duh mkra Mi ti Việt Nam.

Mơ̆ng Êpul anei, hlăm wưng kơ anăp, srăng mâo lu phung duh bu liê Mi hriê ti Đà Nẵng duah klei găl ngă bruă, kyua Đà Nẵng jing anôk hiu čhưn ênguê hing ang mâo dlông rŏng lăn khăp. Ƀuôn prŏng Đà Nẵng mâo phung mă bruă dưi mtô hriăm thâo bruă, mâo kdrŭn ksĭ êa êlam, tač êdeh phiơr prŏng leh anăn anôk bruă nah gŭ iêô jak phung duh bi liê. Khua bi ala Marc Knapper ƀuăn srăng mđĭ phung duh bi liê Mi hriê duh bi liê, amâo djŏ knŏng mjing klei găl kơ dŭm anôk bruă duh mkra mă bruă đuič ôh ƀiădah lŏ mguôp kơ klei mdrŏng msah kơ mnuih ƀuôn sang Đà Nẵng. Nguyễn Văn Quảng, Khua dlăng bruă Đảng ƀuôn prŏng Đà Nẵng mtă hŏng bruă klam pô, Khua bi ala srăng mjưh ruê̆ jăk hĭn dŭm klei bi hgŭm plah wah Êpul hgŭm dŭm anôk bryă Mi ti Việt Nam hŏng ƀuôn prŏng Đà Nẵng.

H’Zawut pô mblang