VOV4.Êđê - Ƀri wưng Tết Nguyên đán Nhâm Dần 2022, aguah mbruê 26/1, êpul ngă bruă mơ̆ng Đảng čar, êpul gơ̆ng bruă ƀuôn sang, bruă sang čư êa, dhar bruă mặt trận čar Dak Lak mơ̆ng Nguyễn Đình Trung, khua bruă Đảng čar ba anăp mâo leh klei nao čuă, hơêč hmưi tết dŭm anôk bruă msĕ si: Knơ̆ng gĭt gai lĭng kahan čar Dak Lak, anôk bruă ksiêm duah kman krĭng Lăn Dăp Kngư leh anăn sang êa drao jing êjai mrô 1.

Hlăm dŭm anôk nao čuă êpul ngă bruă hmư̆ leh khua gĭt gai dŭm anôk bruă hưn mdah klei ngă bruă hlăm grăp anôk bruă ti thŭn 2021 ăt msĕ hŏng hdră tă, bruă klam thŭn 2022, boh nik jing hdră rơ̆ng klei êđăp ênang, mdrao mgŭn kơ phung mâo klei ruă tưp Covid-19 leh anăn kriê dlăng klei suaih pral kơ mnuih ƀuôn sang drông tết thŭn 2022.

Khua bruă Đẳng čar Nguyễn Đình Trung hơêč hmưi thŭn mâo 2022 mâo klei êđăp ênang, klei suaih pral, mơak mñai kơ jih jang phung knuă druh, lĭng kahan, phung ngă bruă mdrao mgŭn, leh anăn mtă brei lŏ bi lar hĭn dŭm boh tŭ dưn dưi mâo, bi leh bruă klam dưi jao leh.

Y-Ƀel pô mblang