VOV4.Êđê - Jing khua bruă Đảng, hlŏng ngă Khua ƀuôn Chơ Rơng 2, să Đăk Ta Ley, kdriêk Mang Yang, čar Gia lai, Gôh, mnuih djuê ana Bahnar mđing mĭn nanao si srăng ngă čiăng mtrŭt mđĭ ai mnuih ƀuôn sang mđĭ kyar bruă duh mkra, mkra mđĭ klei hdĭp. Hŏng klei mđĭ lar bruă klam ba akŏ mơ̆ng Đảng viên, Gôh mbĭt hŏng mnuih hgŭm hlăm anôk bruă Đảng dưi bi mlih leh klei mĭn truh kơ bruă ngă mơ̆ng mnuih ƀuôn sang.

Nao čuă ƀuôn Chơ Rơng hlăk akŏ thŭn 2022, ktuê êlan mơ̆ng êlan dơ̆ng mrô 19 nao mut hlăm ƀuôn bŏ hŏng klei mtah mơ̆ng ana kphê, mbĭt hŏng lu boh sang kjăp mkra mjing bi giăm. Khua ƀuôn Gôh atăt hmei nao mŭt hlăm sa boh sang kdrưh k’ang mrâo rŭ mdơ̆ng mâo ênoh 500 êklăk prăk mơ̆ng Blư̆i. Amâo mâo pô đăo ôh anei jing gŏ sang mrâo tlaih mơ̆ng klei ƀun ƀĭn mâo hŏng anei mrâo 3 thŭn. Blư̆i yăl dliê, lu thŭn êlâo, gŏ sang mâo hma pla mjing kphê leh anăn mdiê lŏ, ƀiădah amâo mâo boh tŭ dưn hlăm bruă duh mkra. Mơ̆ng hruê khua ƀuôn Gôh đru mtô brei klei ngă bruă pla mjing leh anăn kriê dlăng kphê, mkŏ mjing klei găl kơ mnuih ƀuôn sang nao hgŭm hlăm dŭm adŭ mtô bi hriăm mơ̆ng alŭ, ƀuôn leh anăn să, mnuih ƀuôn sang mâo klei mlih hlăm bruă pla mjing, thiăm bruă rông mnơ̆ng dhơ̆ng. leh lu thŭn gĭr ktưn, gŏ sang Blư̆I jing gŏ sang đĭ kyar hlăm ƀuôn. Blư̆i brei thâo:  “Kâo mâo klei hriăm lu êdi, êlâo dih amâo pla mjing kphê, ară anei pla mjing kphê, tiu, rông êmô…Hlăm ƀuôn Chrơng 2 hmei mâo arăng mkăp brei 12 drei êmô mjeh, leh êmô mđai srăng brei êđai êmô kơ gŏ sang mkăn, êmô mjeh pô lŏ dơ̆ng rông, bruă ngă anei jing jăk êdi. Ară anei mâo lu adŭ mtô mjuăt bi hriăm kơ klei pla mjing kphê, tiu leh anăn rông êmô, mkăp brei mjeh mdiê yan puih mnga, kâo gĭr ktưn mă bruă knuă, tui hriăm dŏ mrâo čiăng đru kơ mnuih ƀuôn sang.”

Wưng mơ̆ng thŭn 2018 -2020, khua bruă Đảng nah gŭ Gôh bi mguôp leh hŏng êpul hgŭm bruă phung mniê hlăm ƀuôn ngă bruă hâo hưn, mtrŭt mjhar mnuih ƀuôn sang hlăm ƀuôn hur har tui ngă hdră êlan mkŏ mkra krĭng ƀuôn sang mrâo hŏng hdră knŭk kna đru leh anăn mnuih ƀuôn sang ngă. Mnuih ƀuôn sang đru mguôp prăk kăk leh anăn hruê ai rŭ mdơ̆ng sang bi kƀin ƀuôn, mkra êlan bê tông kjăp leh anăn bi kjăp mnuôr êa. Mtrŭt mjhar dŭm gŏ sang nao hgŭm hlăm dŭm hdră mkăp, klei bi hmô mđĭ kyar bruă duh mkra. Aduôn Kem, khua êpul bruă phung mniê ti Chrơng 2 brei thâo: “Ñu jing sa čô ngă bruă jăk êdi, ba anăp nanao hlăm djăp mta bruă, bi djŏ hŏng mnuih ƀuôn sang leh anăn mnuih ƀuôn sang mâo klei khăo kơ ñu. Kâo pô jing khua êpul bruă phung mniê, buh ñu mâo klei bi hmô, kâo ăt tui hriăm lu mta klei jăk mơ̆ng ñu, hriăm pla mjing kphê, tiu mâo hnơ̆ng boh mnga lu hĭn. Leh anăn grăp blư̆ hlăm ƀuôn mâo bruă anei, bruă dih, ñu kreh mtrŭt mjhar grăp čô, klă klơ̆ng jing khua êpul mơ̆ng 7 êpul hlăm ƀuôn nao hgŭm klei bi kƀĭn, hyuă kjăp hĭn klei bi mguôp”

Nguyễn Thanh Tâm, khua bruă Đảng să Ta Ley, kdriêk Mang Yang brei thâo: Hlăm dŭm thŭn êgao, hŏng bruă klam jing khua bruă Đảng nah gŭ hlŏng ngă jing khua ƀuôn, Ayŏng Gôh mâo nanao klei hâo hưn kơ mnuih ƀuôn sang ti ƀuôn Chrơng 2 hluê ngă djŏ hdră êlan, hdră mtrŭn mơ̆ng Đảng, klei bhiăn ala čar, bi mguôp mđĭ kyar bruă duh mkra leh anăn nao hgŭm hlăm bruă bruă mơ̆ng să mkŏ mjing. Hlăm bruă mkŏ mjing Đảng, ñu tui ngă mâo boh tŭ dưn bruă tui hriăm leh anăn hluê ngă msĕ si Awa Hồ hŏng dŭm bruă ngă klă klơ̆ng, ba wĭt klei jăk kơ mnuih ƀuôn sang “Hŏng bruă klam jing khua bruă Đảng nah gŭ hlŏng ngă jing khua ƀuôn, Ayŏng Gôh jing sa čô ngă bruă hur har, boh nik dưi bi êdah bruă klam jing khua bruă Đảng nah gŭ hlăm bruă gĭt gai, tui ngă dŭm bruă klam hlăm ƀuôn. Êngao kơ anăn, hŏng bruă klam jing khua êpul, ñu ăt mâo klei gĭr jih ai đru kơ mnuih ƀuôn sang hlăm ƀuôn, kyuanăn ñu mâo klei đăo knang mơ̆ng mnuih ƀuôn sang hlăm ƀuông hŏng bruă klam jing khua bruă Đảng nah gŭ hlŏng ngă khua ƀuôn. Hlăm klei ngă bruă klam giăm 3 thŭn, ñu dưi ngă jăk leh bruă klam pô.

Ară anei, ƀuôn Chrơng dưi bi leh ênum hnơ̆ng čuăn kơ krĭng ƀuôn sang mrâo, wăt kơ 2 hnơ̆ng čoh čuăn dleh hĭn hŏng krĭng mnuih djuê ƀiă jing hnơ̆ng gŏ sang ƀun ƀin leh anăn bi doh wăl hdĭp mda, klei hdĭp mơ̆ng 176 gŏ sang hlăm ƀuôn dưi đĭ kyar hĭn, gŏ sang ƀun ƀin knŏng dôk mă 10 gŏ sang. Hluê si ayŏng Gôh, ngă bruă anei jing dleh êdi, mbĭt hŏng klei uêñ mĭn mơ̆ng knŭk kna leh anăn gưl bruă nah dlông, grăp čô đảng viên hlăm bruă Đảng nah gŭ dưi bi êdah leh bruă klam jing gru hmô mơ̆ng pô. “Kâo jing sa čô đảng viên, srăng jing pô ba anăp, jing pô bi hmô kơ mnuih ƀuôn sang. Yuôm bhăn hĭn jing klei blŭ pô jing klei sĭt nik čiăng kơ mnuih ƀuôn sang thâo săng, leh anăn pô blŭ srăng ngă mtam, leh mnuih ƀuôn sang ƀuh pô ngă mâo boh tŭ dưn diñu srăng hluê ngă”

Hŏng khua bruă Đảng nah gŭ Gôh leh anăn jih jang phung đảng viên hlăm bruă đảng nah gŭ ti ƀuôn, Ayŏng Gôh dưi bi êdah leh klei bi hmô ai tiê bruă klam, jhŏng mĭn, jhŏng ngă, jih ai hŏng bruă mbĭt hlăm ƀuôn. Kluôm bruă Đảng nah gŭ hluê ngă, tui hriăm msĕ si Awa Hồ, “bruă mâo klei jăk kơ mnuih ƀuôn sang srăng ngă hŏng jih ai tiê”. Đảng viên Gôh nao êlâo, mnuih ƀuôn sang hrăm mbĭt čoh bruă ngă hma, dôk mkŏ mjing klei mlih jăk hĭn hlăm grăp hruê.