VOV4.Êđê - Tlam hruê 28/6, leh truh ti tač êdeh phiơr London Heathrow mphŭn gưl hiu čhưn ti Angle, Khua bruă kƀĭn ala Vương Đình Huệ lehanăn Êpul bi ala gưl dlông mơ̆ng ala čar drei nao čhưn kơ Anôk bruă bi ala lehanăn bi tuôm hŏng êpul êya mnuih Việt Nam dôk ti Angle. Mơ̆ng klei blŭ hrăm, Khua bruă kƀĭn ala bi mni kơ mnuih ƀuôn sang mâo leh klei hgŭm mguôp, ñŭ kma tŭ jing hŏng ala čar pô dôk.

Boh nik dŭm bruă ngă klă sĭt mơ̆ng êpul, mđing nanao kơ ƀuôn sang, lăn čar pô. Êbeh 3,5 êklăk USD đru kơ mnuih ƀuôn sang ti ala čar hlăm wưng bluh mâo klei ruă tưp leh êgao jing sa klei bi êdah klă. Klei khăp anăn năng mpŭ êdi. Khua bruă kƀĭn ala mñă, klei đĭ kyar ktang kjăp mơ̆ng êpul wưng êgao, mâo klei đru mguôp amâo djŏ điêt ôh mơ̆ng Anôk bruă bi ala Việt Nam ti Angle. Khua bruă kƀĭn ala ăt čang hmăng, êpul êya mnuih Viêt Nam dôk ti Angle lŏ dơ̆ng hgŭm mguôp, mđing dlăng hĭn kơ mnuih Việt Nam pô ênuk gưl mrâo kñăm hưn mthâo mnuih mâo klei thâo hlăm dŭm mta bruă./.

H’Nêč pô mblang