Hlăm klei hiu čhưn kơ ala čar Russia, ti anôk bruă bi ala knŭk kna   Việt Nam, Ti ƀuôn prŏng phŭn Moscow, Khua bruă kƀĭn ala Trần Thanh Mẫn lehanăn êpul bi ala bruă kƀĭn ala gưl dlông Việt Nam bi tuôm lehanăn blŭ hrăm leh hŏng phung knuă druh anôk bruă bi ala, lehanăn mnuih Việt Nam dôk hdĭp ti ala čar Russia.

Blŭ hrăm hŏng mnuih Việt Nam ti ala čar Russia, Khua bruă kƀĭn ala Trần Thanh Mẫn hưn leh klah čŭn kơ bruă kđi čar, bruă duh mkra hlăm lăn čar. Khua bruă kƀĭn ala bi mni kơ ai tiê thâo bi mguôp mơ̆ng mnuih Việt Nam ti Russia, hŏng 60.000 čô mnuih dôk ngă bruă, lehanăn hriăm mjuăt, mâo mkŏ mjing leh klei thâo bi mguôp mbĭt. Khua bruă kƀĭn ala lač, hdră êlan sa hnơ̆ng mơ̆ng Đảng lehanăn knŭk kna mđing nanao kơ mnuih Việt Nam pô dôk hdĭp ti ala tač êngao, jing phung amâo mâo dưi bi ktlah ôh hlăm djuê ana, lehanăn jing phung yuôm bhăn đru hyuă kjăp klei thâo gi hgŭm, plah wah Việt Nam hŏng dŭm ala čar./.