VOV4.Êđê - Aguah hruê 10/3, Dhar bruă gĭt gai anôk bruă kƀĭn ala brei leh Klei blŭ hlăm Asăp mtrŭn ngă hră m’ar ksiêm dlăng, bi mklă ba phung ră rañ matuĭ djăp 12 thŭn truh gŭ 18 thŭn mgô̆ mŭt hlăm anôk mdrao klei ră rañ. Blŭ hrăm ti knăm anei, Khua anôk bruă kƀĭn ala Vương Đình Huệ brei thâo: Dhar bruă gĭt gai anôk bruă kƀĭn ala hluê ngă leh hdră lehanăn akâo klei blŭ hlăm 6 mta bruă. Hluê hŏng klei bi tŭ ư mâo bi mklă leh 2 mta bruă phŭn hlăm klei êmuh hŏng Khua phŭn bruă tuh tia mnia mblei Nguyễn Hồng Diên lehanăn Khua phŭn bruă Ngăn dŏ wăl hdĭp mda Trần Hồng Hà. 

Ti anôk bi kƀĭn aguah, Dhar bruă gĭt gai anôk bruă kƀĭn ala tŭ ư hŏng bruă ba mdah Asăp mtrŭn ngă hră m’ar ksiêm dlăng, bi mklă ba phung ră rañ matuĭ djăp 12 thŭn truh gŭ 18 thŭn mgô̆ mŭt hlăm anôk mdrao klei ră rañ. Khă snăn, hluê si phung bi ala, êpul mnuih mâo mkra mlih hlăm Asăp mtrŭn anei jing mnuih ră rañ matuĭ djăp 12 thŭn truh gŭ 18 thŭn lehanăn klei mgô̆ ba diñu hlăm anôk mdrao klei ră rañ amâo djŏ jing hdră msir đŭ bi kmhal, kyua anăn brei mâo klei ngă hră m’ar jăk găl hĭn, bi êdah klei thâo pap lehanăn rơ̆ng klei tŭ dưị jăk hĭn hŏng mnuih brei ngă klei anei./.

H’Nêč pô mblang