VOV4.Êđê- Aguah mbruê 29/7, ti sang bruă kƀĭn ala, Dhar bruă kbĭn ala mâo leh klei mă bruă hŏng dŭm phŭn, dhar bruă djŏ tuôm kơ dŭm mta phŭn djŏ tuôm hŏng bruă mkra mlih, bi mbŏ hdră mtrŭn mrô 1210 mơ̆ng Dhar bruă kƀĭn ala kơ bruă mbha êpul ƀuôn prŏng leh anăn hdră mtrŭn mrô 1211 kơ hnơ̆ng čoh čuăn anôk bruă knŭk kna leh anăn mbha êpul anôk bruă knŭk kna.

Blŭ hlăm mmông mă bruă, Khua bruă kƀĭn ala Vương Đình Huệ mñă klă, bruă mbha krĭng lăn ala čar jing anôk bruă knŭk kna, êpul êya bruă sang čư êa alŭ wăl jing bruă thơ̆ng leh, bi kơ bruă mbha êpul ƀuôn prŏng, hluê si boh sĭt ti dŭm alŭ wăl mâo sơăi klei bi êdah mkra mlih 2 hdră mtrŭn anei. Khua bruă kƀĭn ala Vương Đình Huệ mtă: Bruă mbha êpul dŭm anôk bruă knŭk kna srăng mâo knhuah hluh hlir ala čar, ƀiădah ăt mâo knhuah thơ̆ng kơ bruă, čiăng mâo klei ksiêm duah tur knơ̆ng, hrăm mbĭt, rơ̆ng klei hluh hlir ala čar, leh anăn mbha gưl kơ bruă sang čư êa dŭm gưl hluê ngă.

Pô mblang: Y-Ƀel Êban