Kñăm lŏ bi hdơr bruă knuă prŏng prĭn mơ̆ng phung nao leh êlâo, ƀri gưl nao čhưn kơ čar Vĩnh Long, aguah mbrue 4/9 Khua bruă kƀĭn ala Trần Thanh Mẫn nao čuh leh brui mngưi, lehanăn mđup myơr mnga ti anôk bi hdơr kơ ayang Khua êpul gơ̆ng phung khua phŭn bruă Phạm Hùng lehanăn anôk bi hdơr kơ ayang khua knŭk kna Võ Văn Kiệt. Čih hlăm hdruôm hră čih pioh tinei, Khua bruă kƀĭn ala Trần Thanh Mẫn bi êdah ai tiê mpŭ hŏng aruăt brui mngưi ti anăp mnguh mngăt ayang khua êpul gơ̆ng phung khua phŭn bruă Phạm Hùng - Khua kiă kriê mâo k'hư̆m prŏng êdi mơ̆ng Đảng, knŭk kna, jing anak mơ̆ng ƀuôn sang Vĩnh Long jhŏng ktang.

Čuh brui mngưi, lehanăn mnga ti alŭ wăl bi hdơr kơ ayang khua knŭk kna Võ Văn Kiệt, ti kdriêk Vũng Liêm, Khua bruă kƀĭn ala Trần Thanh Mẫn mbĭt hŏng êpul ngă bruă bi êdah ai tiê hdơr mnga mpŭ kơ ayang khua knŭk kna Võ Văn Kiệt, pô jih klei hdĭp kyua bruă cách mạng, hur har hŏng lăn čar, sĭt suôr hŏng mnuih ƀuôn sang, hdĭp ênuah ênô thâo luă gŭ, mdưm nanao klei tŭ dưn kơ Đảng, kơ lăn čar, kơ mnuih ƀuôn sang yơh jing tal êlâo hĭn. jing leh sa gru bi hmô jăk kơ knhuah dôk dơ̆ng ƀơ̆ng huă mơ̆ng cách mạng: jing mnuih cộng sản klă sĭt mâo nanao ai tiê khăp hlăm mnuih ƀuôn sang lehanăn hŏng mah jiăng ala tač êngao./.