VOV4.Êđê -Tlam mmăt 6/9, ti Sang bruă kƀĭn ala, Khua bruă kƀĭn ala Vương Đình Huệ drông leh Khua hlăm Anôk bruă Đảng gưl dlông Đảng yang ƀuôn Campuchia (CPP), Khua kiă kriê ƀuôn prŏng phŭn Phnôm Pênh Khuông Sơ-reng, ngă khua Êpul bi ala gưl dlông ƀuôn prŏng phŭn Phnôm Pênh nao čhưn leh anăn mă bruă ti ƀuôn prŏng phŭn Hà Nội.

Khua bruă kƀĭn ala Vương Đình Huệ bi klă, klei mĭn sa anăn mơ̆ng Đảng, Knŭk kna Việt Nam dlăng myuôn klei bi hgŭm “ala čar riêng gah jăk siam, bi hgŭm kluôm ênŭm, hơĭt kjăp sui thŭn” hŏng Campuchia hlăm jih bruă Đảng, Knŭk kna, Bruă kƀĭn ala.

Hlăm boh klei thŭn 2022 jing yuôm bhăn jing thŭn bi hgŭm Việt Nam - Campuchia, bi hdơr 55 thŭn hruê mkŏ mjing klei bi hgŭm plah wah dua ala čar, Khua bruă kƀĭn ala mtă kơ dua ƀuôn prŏng phŭn lŏ dơ̆ng bi trông bi tŭ ư leh anăn mđĭ dŭm bruă mjĕ êrô, bruă bi hgŭm, kah mbha klei thâo hlăm lu mta bruă msĕ si bruă mnia blei, duh bi liê, hiu čhưn ênguê; čang hmăng, Khua kiă kriê ƀuôn prŏng Phnôm Pênh mđing dlăng, mjing klei găl kơ dŭm anôk bruă duh mkra, mnuih ƀuôn sang Việt Nam dôk hdĭp mda, mă bruă ti lăn čar Campuchia./.

H’ Zawut pô mblang