VOV4.Êđê- Tlam mbrue (23/8) ti sang bruă kƀĭn ala, Khua bruă kƀĭn ala Vương Đình Huệ drông čhưn leh Êpul khua bi ala bruă êdam êra, Đảng êngiê ngă phŭn Japon hriê čuă lehanăn mă bruă ti Việt Nam. Khua bruă kƀĭn ala Vương Đình Huệ hơêč hmưi kơ Đảng anei mâo mă leh lu klei tŭ dưn hlăm klei ruah khua bruă kƀĭn ala nah dlông mlan 7 leh êgao. Ksiêm wĭt bruă klam mơ̆ng êdam êra, phung khua prŏng mda asei hlăm klei mđĭ kyar klei bi mguôp Việt Nam – Japon, Khua bruă kƀĭn ala lač, bruă kƀĭn ala Việt Nam sa ai hlăm klei bi mguôp êpul phung mda asei dua ala čar. Lehanăn čang hmăng kơ phung êdam êra mơ̆ng Đảng LDP Japon, lŏ dơ̆ng mđing đru kơ phung êdam êra Việt Nam, mâo hdră êlan bi hgŭm jăk kơ mnuih ngă bruă dua ala čar. Mbĭt hŏng anăn, êdam êra dua ala čar srăng mkŏ mjing Festival êdam êra, phung hriăm gưl prŏng hlăm grăp gưl, boh nik ti thŭn 2023 leh dua ala čar ngă klei bi hdơr 50 thŭn mkŏ mjing klei mjĕ mgiăm. Phung khua prŏng mda asei dua ala čar mđĭ hĭng klei bi mjĕ êrô, bi đru hlăm klei ngă bruă, bi trông kơ djăp mta bruă hlăk mđing./.

Pô mblang: Y-Khem Niê