VOV4.Êđê - Tlam hruê 22/7, ti Sang bruă kƀĭn ala, Khua bruă kƀĭn ala Vương Đình Huệ drông Khua kiă kriê knơ̆ng prăk bi hgŭm quốc tế Japon (JBIC) Maeda Tadashi hriê čhưn lehanăn mă bruă ti Việt Nam.

Ti knăm anei, Khua bruă kƀĭn ala lač jăk kơ Khua JBIC hưn mdah leh 3 hdră prŏng djŏ tuôm kơ hdră đru, bi hgŭm čiăng đru kơ Việt Nam, Knŭk kna, anôk bruă kƀĭn ala bi leh bruă čih mkra hdră bhiăn mđĭ kyar h’ĭt kjăp, boh nik klei bi mlih yan adiê lehanăn bruă pui kmlă doh. Hluê hŏng tur knơ̆ng bi mjĕ jăk siam Việt Nam – Japon, Khua bruă kƀĭn ala đăo knang, Japon srăng jing ƀĭng hgŭm yuôm lehanăn đăo knang hlăm bruă hluê ngă dŭm mta kñăm, hluê ngă klei ƀuăn rơ̆ng mâo ba mdah ti Klei bi kƀĭn COP 26.

H’Nêč pô mblang