VOV4.Êđê- Tlam 29/7, Khua bruă kƀĭn ala Vương Đình Huệ drông leh Pô đru kčĕ Êpul hgŭm phung ngă Bruă kƀĭn ala Japon- Việt Nam Takebe Tsutomu.  Khua bruă kƀĭn ala Vương Đình Huệ bi mni kơ bruă klam mơ̆ng Pô đru kčĕ Êpul hgŭm phung ngă Bruă kƀĭn ala Japon- Việt Nam Takebe Tsutomu hlăm bruă mđĭ klei bi hgŭm plah wah dua ala čar lač mbĭt leh anăn plah wah dua anôk bruă čih mkra hdră bhiăn dua ala čar.

Khua bruă kƀĭn ala Vương Đình Huệ bi mni kơ klei yuôm bhăn mơ̆ng hdră bruă Sang hră gưl prŏng Việt Nam - Japon hlăm sang hră gưl prŏng ala čar Hà Nội; bi êdah klei čang hmăng sang hră gưl prŏng Việt Nam-Japon srăng msĕ si gơ̆ng pui, bi knăl kơ klei bi hgŭm plah wah dua ala čar. Khua bruă kƀĭn ala bi mni kơ bruă Anôk čih hdră bhiăn Japon mkra mđĭ Klei bhiăn bi hriăm bruă kơ mnuh Việt Nam ti Japon; čang hmăng dua ala čar lŏ dơ̆ng bi hgŭm čiăng mđĭ klei tŭ dưn mơ̆ng klei bhiăn bi hgŭm anei; mbĭt anăn ksiêm hriăm mđĭ klei bi hgŭm mnuih mă bruă hlăm wưng kơ anăp./.

Pô mblang: H’Zawut Ƀuôn Yă