VOV4.Êđê -  Aguah 21/3 ti ƀuôn prŏng Hồ Chí Minh, Khua bruă kƀĭn ala Vương Đình Huệ gĭt gai Klei bi kƀĭn ksiêm wĭt bruă knuă Êpul gơ̆ng bruă ƀuôn sang dŭm čar, ƀuôn prŏng krĭng wăl nah Dhŭng thŭn 2021 leh anăn pŏk ngă hdră kčah bruă knuă thŭn 2022. Čiăng msir mgaih klei êdu kƀah hlăm hdră ngă bruă mơ̆ng Êpul gơ̆ng bruă ƀuôn sang dŭm gưl hlăm wưng êgao leh anăn mđĭ klei tŭ dưn ngă bruă mơ̆ng Êpul gơ̆ng bruă ƀuôn sang hlăm thŭn 2022, êpul gơ̆ng bruă ƀuôn sang dŭm gưl brei ngă hdră kñăm, bruă klam, hdră msir klă klơ̆ng. Dua hdră kñăm kluôm mâo êpul gơ̆ng bruă ƀuôn sang dŭm gưl hlăm thŭn 2022 jing brei lŏ dơ̆ng mlih mrâo kơ hdră mkŏ mjing, mđĭ hnơ̆ng jăk ngă bruă mơ̆ng êpul gơ̆ng bruă ƀuôn sang mơ̆ng tur knơ̆ng bi klă klơ̆ng Hdră mtrŭn klei bi kƀĭn phung bi ala kluôm ala tal XII mơ̆ng Đảng, Hdră mtrŭn mơ̆ng bruă kƀĭn ala, Knŭk kna, Hdră mtrŭn mơ̆ng bruă đẩng čar, ƀuôn prŏng leh anăn hdră bhiăn knŭk kna, êpul gơ̆ng bruă ƀuôn sang pŏk nga wtŭ dưn bruă “mđĭ hnơ̆ng jăk, klei tŭ dưn ngă bruă mơ̆ng êpul gơ̆ng bruă ƀuôn sang dŭm gưl” wưng 2021-2026 čiăng kơ êpul gơ̆ng bruă ƀuôn sang klă sĭt jing anôk bruă mâo klei dưi knŭk kna ti alŭ wăl, bi ala kơ klei mĭn, klei čang hmăng leh anăn klei dưi ngă khua mơ̆ng ala ƀuôn, đua klam ti anăp mnuih ƀuôn sang alŭ wăl leh anăn anôk bruă knŭk kna gưl dlông.

H’Zawut pô mblang