VOV4.Êđê - Tlam mmăt mbruê 20/7, ti sang bruă kƀĭn ala, Khua bruă kƀĭn ala Vương Đình Huệ tŭ drông leh khua bruă Đảng gưl dlông, k’iăng khua bruă kƀĭn ala Lao Sounthone Xayachak, khua gĭt gai êpul khua êmua bi hgŭm Việt Nam – Lao leh anăn êpul bi ala bruă kƀĭn ala Lao hriê čuă, mă bruă ti ala čar Việt Nam. Khua bruă kƀĭn ala Vương Đình Huệ yap yuôm bhăn klei hriê čuă mơ̆ng k’iăng khua bruă kƀĭn ala Lao dưi mkŏ mjing djŏ wưng 2 ala čar bi hdơr 60 thŭn mkŏ mjing klei mjĕ giăm 2 ala čar. Khua bruă kƀĭn ala Vương Đình Huệ yap yuôm bhăn ai tiê gĭr ktưn mlih mrâo mơ̆ng ala čar Lao hlăm hruê mmông êgao. Hlăm mmông tŭ drông, Khua bruă kƀĭn ala Vương Đình Huệ leh anăn k’iăng khua bruă kƀĭn ala Lao bi tŭ ư, hlăm hruê mmông kơ anăp, 2 tĭng srăng lŏ mđĭ hĭn klei bi trông dŭm gưl, dhar bruă, dŭm êpul phung khua êmua bi hgŭm, êpul gơ̆ng bruă ƀuôn sang dŭm alŭ wăl, boh nik jing klei bi mguôp kñăm kah mbha klei thâo hlăm bruă čih mkra klei bhiăn, ksiêm dlăng leh anăn bi klă dŭm boh klei yuôm bhăn hlăm ala čar. Khua bruă kƀĭn ala Vương Đình Huệ mñă klă, bruă kƀĭn ala Việt Nam srăng ngă jih ai pô kah mbha klei thâo hdơ̆ng pô, mbĭt anăn hmăng hmưi mđĭ kyar klei mjĕ giăm bruă kƀĭn ala 2 ala čar knar hŏng klei mjĕ giăm 2 ala čar, jing klei bi hmô hlăm klei bi mguôp bruă kƀĭn ala.

Y-Ƀel pô mblang