VOV4.Êđê - Ƀri hruê nao mă bruă tal êlâo hĭn ti thŭn Nhâm Dần, aguah mbruê 7/2, ti sang bruă kƀĭn ala, Khua bruă kƀĭn ala Vương Đình Huệ leh anăn phung khua gĭt gai bruă kƀĭn ala mâo leh klei bi tuôm, jao bruă klam kơ phung bi ala bruă kƀĭn ala thơ̆ng kơ bruă, phung knuă druh, phung mă bruă knŭk kna leh anăn mnuih mă bruă hlăm adŭ bruă kƀĭn ala. Blŭ hlăm klei bi tuôm anăn, Khua bruă kƀĭn ala Vương Đình Huệ mñă klă, klei hmăng hmưi mdrŏng sah djuê ana klnang kơ dŭm klei êdah kdlưn hlăm dŭm hdră êlan, hlăm anăn mâo klei êdah kdlưn hlăm klei kiă kriê. Khua bruă kƀĭn ala Vương Đình Huệ lŏ hâo hưn kơ klei nao čuă hơêč hmưi Tết Nguyên đán mơ̆ng Khua bruă kƀĭn ala mbĭt hŏng êpul ngă bruă ti 6 čar krĭng dhŭng leh anăn dŭm bruă ngă mơ̆ng phung k’iăng khua bruă kƀĭn ala. Khua bruă kƀĭn ala Vương Đình Huệ mñă klă, bi kơ bruă ksiêm dlăng, leh êdei Tết Nguyên đán, phung khua êpul ksiêm dlăng srăng ngă bruă jih hnơ̆ng čiăng tui ngă 4 hdră mkăp ksiêm dlăng mơ̆ng bruă kƀĭn ala bi êdah leh, mbĭt anăn ksiêm dlăng 107 hdră mkăp hlăm hdră êlan ngă bruă mơ̆ng êpul bruă Đảng hlăm bruă kƀĭn ala tui ngă hdră mtrŭn mơ̆ng klei kƀĭn kluôm Đảng tal 13 leh anăn 137 bruă klam čih mkra klei bhiăn hluê sui klei klă mrô 19 mơ̆ng phŭn bruă kđi čar leh anăn hdră tă hlăm hdră mkŏ mjing klei bhiăn ala čar wưng bruă kƀĭn ala tal 15.

Y-Ƀel pô mblang