VOV4.Êđê - Lŏ dơ̆ng hdră mă bruă ti Dhŭng kwar krah, tlam hruê 26/7, Khua bruă kƀĭn ala Vương Đình Huệ lehanăn êpul mă leh bruă hŏng Anôk kriê dlăng bruă Đảng Quảng Ngãi. Hluê klei hưn mơ̆ng phung khua čar Quảng Ngãi, hnơ̆ng đĭ kyar GRDP thŭn 2021 mâo 6,05%; 6 akŏ thŭn truh 6,34%.

Bruă tuh tia mkra mjing ăt jing boh kdrŭt phŭn kơ hdră đĭ kyar mơ̆ng čar; bruă hiu čhưn ênguê, bruă nah tluôn mâo klei mkra mlih jăk, hnơ̆ng hrui wĭt ngăn prăk đĭ, êgao 51,1% ênoh gưl dlông kčah jao; 6 mlan akŏ thŭn mâo giăm 17.000 êklai prăk.

Sa ai hŏng hdră êlan, bruă klam mơ̆ng čar wưng ti anăp, Khua bruă kƀĭn ala mtă kơ Quảng Ngãi lŏ dơ̆ng mlih mrâo, gĭr hluê ngă bruă klam kđi čar, mđing kơ dŭm bruă prŏng, ba yua jih klei găl mâo alŭ wăl, kpưn đĭ jing čar đĭ kyar hluê si klei čang hmăng mơ̆ng ayang Khua knŭk kna hđăp Phạm Văn Đồng, čiăng Quảng Ngãi jing sa hlăm dŭm kỉĭng đĭ kyar ti kwar krah./.

H’ Nêč pô mblang