Blŭ hlăm mmông mă bruă, Khua bruă kƀĭn ala Vương Đình Huệ mñă klă, hdră bhiăn Bruă tuh tia bruă lĭng kahan, Klei êđăp ênang leh anăn mđĭ ai bruă tuh tia mâo boh tŭ dưn yuôm bhăn, mâo lu hdră êlan mdê hĭn, kdlưn hĭn čiăng đĭ kyar, bi kjăp bruă tuh tia bruă lĭng kahan, klei êđăp ênang, mđĭ lar ai dưi bruă duh mkra mơ̆ng lăn čar.

Hdră bhiăn kñăm bi klă dŭm klei mĭn, hdră mtrŭn mơ̆ng Gưl dlông kơ hdră êlan kơ bruă tuh tia bruă lĭng kahan, klei êđăp ênang. Khua bruă kƀĭn ala Vương Đình Huệ yap yuôm bhăn dŭm anôk bruă kiă kriê klei čih mkra leh anăn ksiêm dlăng mâo leh klei gĭr hluê ngă, mđing hmư̆ leh anăn mkra mlih hdră bhiăn. Hdră bhiăn jing klei găl kơ bruă tuh tia bruă lĭng kahan đĭ kyar, klei êđăp ênang dưi rơ̆ng kjăp, boh nik hlăm wưng tar rŏng lăn mâo lu klei mlih msĕ ară anei.