VOV4.Êđê - Hlăm hdră hiu čhưn ti Việt Nam, tlam hruê 22/6, Khua bruă kƀĭn ala Mozambique lehanăn êpul bi ala gưl dlông mơ̆ng anôk bruă kƀĭn ala Mozambique nao čhưn, mă leh bruă hŏng ƀuôn prŏng Cần Thơ. Blŭ hrăm hŏng Khua bruă Đảng ƀuôn prŏng Cần Thơ, Khua bruă kƀĭn ala Mozambique bi mni kơ klei bi mjĕ jăk siam plah wah anôk bruă kƀĭn ala dua ala čar Việt Nam – Mozambique hluê hră bi hdơr kơ klei hgŭm bruă plah wah anôk bruă kƀĭn ala Việt Nam lehanăn anôk bruă kƀĭn ala Mozambique. Kơ klei bi hgŭm hlăm wưng ti anăp, Lê Quang Mạnh, Khua bruă Đảng ƀuôn prŏng Cần Thơ brei thâo, mprăp kah mbha klei thâo hlăm bruă rông mnơ̆ng hlăm êa, bruă pla mjing, klei thâo hlăm bruă pla, mkra mjing, mđĭ hnơ̆ng mâo boh mnga lehanăn hnơ̆ng tŭ jăk mnơ̆ng dhơ̆ng; Bi hgŭm duh bi liê mđĭ kyar bruă mjut mjing mjeh mnơ̆ng pla, mnơ̆ng rông mâo hnơ̆ng tŭ dưn, mkŏ mjing krĭng pla mdiê tŭ jăk hluê gru hmô kdrăn lŏ prŏng, mkŏ mjing krĭng rông mnơ̆ng êđăp ênang, bi hgŭm kah mbha klei thâo hlăm bruă mkra mjing, kriê pioh mnơ̆ng dhơ̆ng, mđĭ boh tŭ yuôm mnơ̆ng bruă lŏ hma phŭn, bi trông kơ bruă mnia mblei mnơ̆ng lŏ hma./.

H’Nêč pô mblang