VOV4.Êđê - Aguah mbruê 9/2, Khua bruă kƀĭn ala Vương Đình Huệ mâo leh klei nao čuă, hơêč hmưi tết leh anăn ksiêm dlăng đa đa bruă kơ klei čih yap mklin bruă knuă thŭn 2021, hdră tă thŭn 2022, bruă tui ngă asăp mtrŭn mrô 11 mơ̆ng êpul khua bruă gĭt gai hlăm bruă mkŏ mjing Tết Nhâm Dân thŭn 2022 ti ƀuôn prŏng Hải Phòng.

Bi ala kơ phung khua gĭt gai Đảng, knŭk kna, bruă kƀĭn ala, dhar bruă gĭt gai bruă kƀĭn ala, Khua bruă kƀĭn ala čih yap, pah mni leh anăn yap yuôm bhăn dŭm boh tŭ dưn mơ̆ng bruă Đảng ƀuôn prŏng, bruă sang čư êa leh anăn mnuih ƀuôn sang ti ƀuôn prŏng Hải Phòng dưi mâo hlăm hruê mmông êgao. Mñă ktang kơ dŭm hdră tă, bruă klam thŭn 2022 ti ƀuôn prŏng Hải Phòng jing kluôm ênŭm, Khua bruă kƀĭn ala mtă, lŏ čuê dŭm boh tŭ dưn dưi mâo hlăm thŭn 2021, thŭn 2022, Hải Phòng čiăng lŏ kñăm gĭt gai, ktrâo lač tui ngă mâo boh tŭ dưn dŭm hdră mtrŭn mơ̆ng gưl dlông kơ bruă kñăm mđĭ kyar bruă duh mkra – ala ƀuôn thŭn 2022 hluê si ai tiê mjêč, ktang phĭt mơ̆ng leh klei mdei tết.

Y-Ƀel pô mblang