VOV4.Êđê- Hlăm jar nao čhưn klă sĭt ti ala mtao Ăngle, hruê 30/6, Khua bruă kƀĭn ala Vương Đình Hụê nao leh hlăm Klei bi kƀĭn bi hgŭm bruă sang hră Việt Nam - Ala mtao Ăngle. Blŭ hrăm hlăm klei bi kƀĭn, Khua bruă kƀĭn ala Vương Đình Hụê lač, bruă sang hră jing bruă ala čar mrô sa ti Việt Nam, mđĭ kyar bruă mtô bi hriăm dưi bi mklă jing sa hlăm 3 mta êdeh kdlưn čiăng ngă Hdră mđĭ kyar bruă duh mkra-ala ƀuôn Việt Nam.

Klei bi kƀĭn kơ bruă sang hră, mâo sa hnơ̆ng lŏ yuôm bhăn hĭn kơ bruă djŏ tuôm kơ mnia blei, duh mkra, duh bi liê. Khua bruă kƀĭn ala čang hmăng, dua tĭng brei mđing dlăng kơ dŭm bruă msĕ si: Knŭk kna Ăngle lŏ dơ̆ng đru kơ bruă mtô leh anăn hriăm klei Ăngle ti Việt Nam, lŏ dơ̆ng mđĭ prăk đru hriăm hră kơ hđeh sang hră Việt Nam; mđĭ ênoh dŭm hdră bi hgŭm mtô bi hriăm hŏng dŭm sang hră gưl prŏng mâo kơhưm ti Ăngle, hlăm anăn mđing kơ bruă kreh knhâo, kdrăp mrâo leh anăn mtô bi hriăm phung nai prŏng./.

                                               Pô mblang: H’Zawut Ƀuôn Yă