Ƀri bi hdơr 95 thŭn, hrue mkŏ mjing Knơ̆ng kiă kriê êpul hgŭm mnuih mă bruă Việt Nam, aguah mbrue (28/7), ti sang dhar kreh Việt Xô, ƀuôn prŏng Hà Nội, Knơ̆ng kiă kriê êpul hgŭm mnuih mă bruă Việt Nam mkŏ mjing leh knăm mđup brei “Klei pah mni Nguyễn Văn Linh” gưl tal 4, Bi mni kơ phung khua kiă kriê bruă công đoàn nah gŭ, êpul hgŭm mnuih ngă bruă nah gŭ mâo leh klei kdlưn hĭn hlăm kluôm ala tal 5 lehanăn tŭ mă mêđai mă bruă mrô Sa mơ̆ng Khua lăn čar mđup brei kơ Knơ̆ng kiă kriê êpul hgŭm mnuih mă bruă Việt Nam. Khua buă kƀĭn ala Trần Thanh Mẫn nao lehanăn blŭ hrăm ti knăm anei.

Bi ala kơ Đảng, kơ Lăn čar, Khua bruă kƀĭn ala Trần Thanh Mẫn bi mni kơ dŭm boh tŭ dưn bruă Công đoàn, êpul mnuih mă bruă hlăm kluôm ala mâo leh hlăm 95 thŭn êgao, hơêč hmưi kơ 10 čô knuă druh bruă Công đoàn mâo mđup brei klei pah mni Nguyễn Văn Linh lehanăn 95 čô jinhg khua kiă kriê bruă  công đoàn nah gŭ, êpul hgŭm mnuih mă bruă kdlưn hĭn mâo tŭ mă klei pah mni. Khua bruă kƀĭn ala Trần Thanh Mẫn mtă, bruă Công đoàn dŭm gưl lŏ dơ̆ng ngă bruă tŭ jing hĭn hdră mtrŭn mơ̆ng klei bi kƀĭn prŏng Đảng 13; hdră mtrŭn mrô 02 mơ̆ng phŭn bruă kđi čar kơ klei mlih mrâo, lehanăn jih jang bruă mơ̆ng Công đoàn Việt Nam hlăm boh klei mrâo, lehanăn dŭm hdră êlan mơ̆ng Đảng, klei bhiăn mơ̆ng knŭk kna kơ bruă mkŏ mjing jih jang bruă Công đoàn.