Bruă anei mâo mkŏ hŏng online truh 57 anôk hŏng knơ̆ng kiă kriê kahan răng mgang knông lăn dŭm boh čar, dŭm boh kđông hlăm krĭng tiah kbưi, plao ksĭ. Bi ala kơ phung khua kiă kriê Đảng, knŭk kna, Khua bruă kƀĭn ala bi trông bi mni kơ dŭm boh tŭ dưn kahan răng mgang knông lăn mâo ba wĭt leh, lehanăn mâo klei lač jăk truh hŏng dŭm klei săn asei mlei prŏng prĭn mơ̆ng phung kahan răng mgang knông lăn, ejai dôk găn djăp mta klei dleh dlan, boh nik hlăm dŭm hrue Tết.

Hlăm wưng tinăp Khua bruă kƀĭn ala Vương Đình Huệ mtă, kahan răng mgang knông lăn lŏ dơ̆ng bi kjăp, hlue ngă ênŭm hdră êlan mơ̆ng Đảng, klei bhiăn knŭk kna kơ bruă răng mgang klei êđăp ênang ti knông lăn. Wưng anei, Khua bruă kƀĭn ala mơĭt leh mnơ̆ng mđup brei truh kơ dŭm boh kđông dôk hlăm krĭng dleh dlan, dŭm boh kđông mâo bruă klam lŏ rông hđeh êrĭt êrin, mâo klei hdĭp dleh dlan lehanăn 354 čô hđeh jing “anak rông kơ kđông răng mgang knông lăn”./.