VOV4.Êđê - Aguah mbrue (6/9), ti čar Ninh Bình mkŏ mjing leh knăm bi hdơr 50 thŭn klei kuôl kă kơ bruă răng mgang knhuah gru dhar kreh, lehanăn lăn êa dliê kmrơ̆ng dlông rŏng lăn hŏng akŏ: “50 thŭn kơ anăp: Knhuah gru dhar kreh dlông rŏng lăn, hŏng ai čŏng duh mĭn, mâo knhuah klei thâo khăp lehanăn klei mlih mrâo hlăm bruă knuă”.

Khua bruă kƀĭn ala Vương Đình Huệ mbĭt hŏng phung khua kiă kriê Đảng, Knŭk kna, bruă kƀĭn ala nao hlăm knăm bi hdơr anei. Dhar kreh pô mâo lu mta, Việt Nam mâo ruah leh, ngă hră mơar truh 8 mta knhuah gru dhar kreh, anôk lăn êa dliê kmrơ̆ng jăk êdi, lehanăn mâo UNESCO dăp hlăm knhuah gru dhar kreh dlông rŏng lăn, mbĭt hŏng anăn nao hlăm klei kuôl kă thŭn 1972 truh kơ ară anei, Việt Nam mâo leh 5 blư̆ klam ngă jing pô dôk hlăm Êpul Gơ̆ng kiă kriê UNESCO. Knăm bi hdơr 50 thŭn klei kuôl kă bruă răng mgang knhuah gru dhar kreh lehanăn lăn êa dliê kmrơ̆ng dlông rŏng lăn mâo mkŏ mjing ti Ninh Bình êjai UNESCO mtrŭt djăp ala čar jing ƀĭng hgŭm bi mkŏ mjing klei bi hdơr 50 thŭn klei kuôl kă, anăp truh kơ klei bi hdơr tar rŏng lăn ti Florence, ala čar Italia hlăm mlan 11/2022. Klei anei srăng pŏk êlan kơ jih jang bruă ngă hlăm tar rŏng lăn bi hdơr 72 thŭn klei kuôl kă, lehanăn kruak knăl 35 thŭn dưl hluê ngă klei kuôl kă ti Việt Nam./.

Y-Khem pô mblang